Akŏ bruă man pơkra tơdron rơdêh por jar kmar Long Thành lĕ akŏ bruă man pơkra tơdron rơdêh por prong hloh amăng dêh čar dong mơng hlâo anun. Ră anai bruă man pơkra hơdôm anih phun glăk hơmâo kông ti tơdron rơdêh por Việt nam pơtrut tañ djơ̆ hăng tơlơi git gai mơng Kơnuk kơna pơhlôm djơ̆ hơnong pơkă ba nao mă yua hlâo kơ lơ 2/9/2026. Anai lĕ tal 5, Khua dêh čar ơi Phạm Minh Chính nao pel ĕp tơl anih bruă man pơkra tơdron rơdêh por Long Thành.

Ƀơi anih man pơkra, Khua dêh čar hơmâo pel ĕp kơ bruă man pơkra hơdôm anih. Hăng hơnong pơkă truh rơnuč thun 2025 djop akŏ bruă anai kiăng man pơkra giong hăng rơnuč blan 2 thun 2026 dưi mă yua tơdron rơdêh por. Khua dêh čar rơkâo bruă man pơkra kiăng pơhlôm djơ̆ hrơi mông, kjăp, hiam hloh, pơhlôm rơnuk rơnua brơi mơnuih mă bruă, kiăng gir run găn rơgao tơnap tap, mă bruă tơhrơi kah hăng mlăm, mă bruă wŏt amăng hrơi pơdơi ngă yang prong kiăng dưi pơgiong tui hơnong pơkă ba tơbiă.