Amăng mông jơnum, Khua git gai pơ ala mơnuih ƀôn sang dêh čar ơi Trần Thanh Mẫn lăng yôm, thun rơgao dua bơnah hơmâo gum hrŏm pơplih pơkra, ba tơbiă lu črăn tơlơi phiăn yôm phăn; prap lui klă hrơi plĕ hră ruah Khua pơ ala mơnuih ƀôn sang dêh čar hăng khua mua pơ ala mơnuih ƀôn sang djop gưl.

Khua git gai pơ ala mơnuih ƀôn sang dêh čar rơkâo, pơ anăp anai, dua anom bruă kiăng tŏ tui kơtưn gum hrŏm amăng čih pơkra tơlơi phiăn hăng krăo lăng, tŏ tui tơlơi gơgrong mơng Khul črâo bruă, ƀing rơgơi kơhnâo amăng tơlơi pơgôp hiăp kơ hơdră bruă; laih dong, kiăng hrưn đĭ klă bruă bưp mơnuih ƀôn sang mơng Khua pơ ala mơnuih ƀôn sang dêh čar hăng khua mua pơ ala mơnuih ƀôn sang djop gưl, pơhlôm tơlơi ƀuăn ƀơi anăp mơnuih ƀôn sang ruah khua hơmâo ngă tui sit nik.

Lăi pơtong hơnong pơkă amăng thun 2026 pơtrut tañ kiăng pơđĭ kyar dua mrô, tui Khua git gai pơ ala mơnuih ƀôn sang dêh čar, dua bơnah gum hrŏm kiăng ba tơbiă hơdôm hơdră bruă, glông jơlan git gai wai lăng kiăng tơlơi bơwih ƀong-mơnuih mơnam pơđĭ kyar, pơgang rơnuk rơnua-hơđong, pơjing anih anom kơđi čar mă bruă tơpă, hơđong kjăp, kơtưn bruă pơtom hiăp, bruă pơgăn hưp ƀong kông ngăn, ngă soh, yua kông ngăn khưi khai.