Tal pơplông abih anih 12 thun 2024 hơmâo pơphun hơđong kar hăng rơwang thun 2020-2023 mơn. Mrô čơđai nao pơplông thun anai rơbêh 1 klăk 71 rơbâo čô, đĭ rơbêh kơ 45 rơbâo čô čơđai pơhmu hăng thun hlâo.

Pơhiăp pơtum glăi mông jơnum, Kơ-iăng khua ding jum pơtô hăng pơjuăt Phạm Ngọc Thưởng, Khua Anom git gai dêh čar kơ bruă pơplông abih anih 12 thun 2024 kiăng Anom bruă git gai pơplông hơdôm boh tơring čar, ƀôn prong pok pơhai rơđah Tơlơi pơčrâo trun mrô 15 mơ̆ng Khua dêh čar kơ pơđĭ tui bruă git gai, ngă hrŏm pơplông abih anih 12 hăng ruah hrăm gưl prong, pơtô hrăm bruă thun 2024. Pran jua ngă bruă lĕ khŏm răng kơđiăng, ngă gêh gal kơ ƀing čơđai, amĭ ama ƀing čơđai, ƀu brơi pô hlơi lui pơplông yua sang anŏ tơnap; pơhlôm rơnuk rơnua, tơpă sit; pơsir hĭ tañ djŏp bruă ƀu djơ̆, tơlơi truh ƀu hmao thâo, khut khăt ƀu brơi čơđai djă ba măi telephôn, măi pơkŏn djă ba amăng anih pơplông.