Đĭ pơhiăp amăng mông jơnum, Khua git gai pơ ala mơnuih ƀôn sang dêh čar ơi Vương Đình Huệ rơkâo ƀing khua mua sem lăng tong ten, sit nik, tơpă sit, djop mơta hơdôm boh than dưi ngă; lăi nao rơđah hơdôm anŏ aka ƀu klă; mơng anun ba tơbiă, pơgôp hơdră pơsir kiăng ba glăi boh tŭ yua lu ƀiă dong amăng thun 2023; sem lăng, pơsit hơnong pơkă hăng bruă jao, hơdră ngă tui akŏ bruă pơđĭ kyar bơwih ƀong huă-mơnuih mơnam, prăk kak, ngăn drăp kơnuk kơna thun 2024.

Hrŏm hăng anun, Khua pơ ala mơnuih ƀôn sang dêh čar amra sem lăng, pơsit bruă git gai sa, dua boh tơhnal mơng tơlơi pơtrun mrô 53 kơ hră lăi pơthâo kơsem min dưi ngă tui akŏ bruă pơhrui glăi lŏn mơnai, duh glăi prăk, gum djru, man pơdong plơi pla phrâo mơng tơdron rơdêh por jar kmar Long Thành; sem lăng boh than ngă tui tơlơi pơtrun mrô 43 kơ hơdră bruă prăk kak djru jơlan hơdră hơkrŭ glăi hăng pơđĭ kyar bơwih ƀong huă-mơnuih mơnam; boh tơhnal pel ĕp črăn tơlơi phiăn tui tơlơi rơkâo amăng tơlơi pơtrun mrô 101 mơng Khua pơ ala mơnuih ƀôn sang dêh čar tal XV.

Mơguah lơ 23/10, ƀơi Tal jơnum lok 6, Khua pơ ala mơnuih ƀôn sang dêh čar ta tal 15, Khua dêh čar ta, ơi Phạm Minh Chính hmâo lăi pơdah tơlơi lăi pơthâo glăi bôh tơhnal ngă tui kơčăo bruă pơđĭ kyar bơwih ƀong – mơnuih mơnam thun 2023; pơkă hlâo kơčăo bruă pơđĭ kyar bơwih ƀong – mơnuih mơnam thun 2024. Tui tơlơi lăi pơthâo glăi, bơwih ƀong – mơnuih mơnam tô̆ tui dong jơlan gah hơkrŭ glăi, phun ñu hmâo laih tơhnal pơkă abih bang ba tơbiă; Bruă bơwih ƀong Việt Nam jing gru rơđah dong mơ̆ng bruă bơwih ƀong đơ đam rŏng lŏn tơnah.

Dap glăi bruă bơwih ƀong dưi pơtrut kơtang dong; pơtrut klă pơplih mrô; Hơdôm bruă bôh thâo, mơnuih mơnam dưi đing nao tuh pơplai pơđĭ kyar, ba glăi bôh tơhnal rơđah rơđông hloh. Hluai tui bôh tơhnal mơng 9 blan hmâo, yap him lăng sa thun 2023 hrưn đĭ hmâo ƀiă biă mă ñu 10/15 tơhnal pơkă dưi ngă hăng hloh kơ tơhnal ba tơbiă. Hrŏm hăng anun Khua dêh čar ta hmâo črâo tơbiă laih tơhnal pơkă abih bang, hrŏm hăng anun ăt lăi rơđah mơn 12 bruă jao, jơlan pơsir phun thun 2024 hăng pơ̆ anăp anai, amăng anun lăi rơđah 15 tơhnal pơkă phun kơ hơdôm bruă bơwih ƀong, mơnuih mơnam, anih anom dô̆./.