Jơnum hơmâo lăng mơ̆ng ataih pơtruh hăng 28 Jơnum min mơnuih ƀôn sang 28 boh tơring čar ƀôn prong ter hang ia rơsĭ hăng hơdôm ding jum, anom bruă bơdjơ̆ nao. Pơhiăp ƀơi mông jơnum, Kơ-iăng khua dêh čar Trần Lưu Quang lăi, bruă ƀu dưi lŏm hĭ ôh “Hră kơñĭ” EC laih anun tơdah djơ̆ “Hră mriah” lĕ ƀu kơnong rơngiă prăk bơwih ƀong đôč ôh mơ̆ ăt ngă tơlơi hmư̆ hing, kơdrưh mơ̆ng Việt Nam rơngiă tui mơn, anom bruă mă akan hơdang amra bưp tơlơi truh arăng phak hră kơñĭ ƀơi hơdôm anih sĭ mơdrô pơkŏn gah rơngiao EU.

Kơ-iăng khua dêh čar kiăng ƀing apăn bruă hyu tir hloh, wai lăng kơjăp hloh ƀơi ia rơsĭ, ƀu brơi ƀat tô hyu mă akan pơpă ôh ngă soh nao pơ ia rơsĭ dêh čar arăng. Ding jum kông an ječ ameč hyu ĕp, sem lăng, pơsit bruă bơdjơ̆ nao bruă ngă soh; čih pơkra hră pơ-ar, ngă kơđi bruă hyu pơgăp, ngă gong jơlan, pơtruh brơi ƀat tô mă akan, mơnuih mă akan Việt Nam nao mă akan soh tơlơi phiăn ƀơi ia rơsĭ dêh čar arăng.