Pơhiăp ƀơi mông jơnum, Ding kơna Ding jum kơđi čar, Khua gum bruă git gai Ping gah ơi Trần Cẩm Tú tŭ yap, lăng yom pran jua, tơlơi gơgrong bruă mơ̆ng ƀing hyu mă tơlơi pơhing mơ̆ng djŏp anom bruă čih tơlơi pơhing čar ta hăng čar rơngiao amăng bruă pôr pơthâo kơ mông Jơnum ruah khua ping gah dêh čar tal 14. Laih dong brơi thâo, Jơnum ruah khua ping gah dêh čar tal 14 amra pơphun ƀơi Hà Nội mơ̆ng lơ 19 truh 25/1/2026, hơmâo 1.586 čô khua, pơ ala brơi rơbêh 5,6 klăk čô ping gah Cộng sản Việt Nam, hăng jơlan ngă bruă “Gum pơgôp - Ngă pô - Tui tơlơi phiăn - Pơplih prong - Đĭ kyar”.

Sa tơlơi hmư̆ hing amăng bruă prăp rơmet Jơnum ruah khua ping gah dêh čar tal 14 lĕ pơplih kơtang čih pơkra hră pơ-ar tơlơi pơtrun yom. Tal blung a, klâo pok hră lăi pơthâo yom (Hră lăi pơthâo kơđi čar, hră lăi pơthâo Bơwih ƀong huă - mơnuih mơnam hăng Hră lăi pơthâo akŏ pơdong Ping gah) hơmâo pơƀut glăi jing sa Hră lăi pơthâo bruă kơđi čar mut hrŏm, dưm kơnar. Ƀu kơnong pơdơi yah bruă pơsit rơđah tơlơi pơmin, tơlơi gơñăm nao đôč ôh, Hră pơ-ar yom Jơnum ruah khua ping gah dêh čar tal 14 ăt djă ba bruă mă tong ten, rơđah rơđông, pơsit rơđah akŏ bruă, hrơi pơkă hăng tơlơi gơgrong ngă bruă. Tơlơi anai brơi ƀuh anŏ gir run ba Tơlơi pơtrun mut amăng tơlơi hơdip rim hrơi tơdơi kơ mông Jơnum, pơsir hĭ bruă kaih pok pơhai. Bruă tơña mơnuih ƀôn sang hăng Hră pơtrun, hăng giăm 14 klăk wơ̆t pơgôp hiăp jing tơlơi pơsit brơi yom biă mă kơ tơlơi mut hrŏm plah wah Ping gah hăng pran jua Mơnuih ƀôn sang, laih dong pơƀuh mrô rơnoh tŭ ư hrŏm mơ̆ng mơnuih tơpuôl prong biă mă hăng hơdôm jơlan ngă bruă prong mơ̆ Jơnum ping gah dêh čar tal 14 ba tơbiă. Hrŏm hăng anun, bruă pơphun, djru prăp rơmet, rơnuk rơnua hăng pôr pơhing hơmâo ngă tañ, djơ̆ lăp, ngă kjăp tui pran jua đăo kơnang mơ̆ng ƀing khua, mơnuih ping gah hăng mơnuih ƀôn sang hăng mông Jơnum anai, pơjing tơlơi tŭ ư hrŏm ha amăng plĕ amăng Ping gah hăng amăng mơnuih tơpuôl./.