Mơguah anai (23/9), ƀơi Sang mă bruă Khua pơ ala mơnuih ƀôn sang, Jơnum min apăn bruă Khua pơ ala mơnuih ƀôn sang dêh čar ta yak mut tal 2 mơ̆ng mông jơnum tal 37. Amăng mơguah anai, Jơnum min apăn bruă Khua pơ ala mơnuih ƀôn sang dêh čar ta gum pơhiăp kơ rơwang bruă Tơlơi phiăn mă jia bruă blơi sĭ gơnam tam phara. Tơlơi lăp đing nao, hră čih Tơlơi phiăn mă jia blơi sĭ gơnam phara pơkă: mă jia blơi sĭ gơnam phara pioh kơ tơpai, ƀiêr amra pơphun mă yua rơnoh mă jia đĭ na nao mơ̆ng thun 2026 hăng truh kơ thun 2030 amra gơgrong ba tuh jia đĭ truh 100%.

Amăng mông bơkơtuai gum pơhiăp Hră čih rơwang bruă Tơlơi phiăn mă jia blơi sĭ gơnam phara (pơplih pơkra) yua kơ Khul anom bơwih ƀong tuh pơplai dêh čar tač rơngiao gum hrŏm hăng hră pơhing Đại biểu Nhân dân pơphun phrâo anai, ƀing juăt bruă, pơ ala kơ anom bơwih ƀong hmâo ba tơbiă hơdôm tơlơi rơkâo đĭ pioh pơhlôm tơlơi dưi yua kơplah wah Gong gai dêh čar hăng Anom bơwih ƀong. Kiăo tui anun, hơdôm bôh anom bơwih ƀong tŭ ư hrŏm hăng tơlơi pơmin mơ̆ng Ping gah hăng Kơnuk kơna amăng bruă mă yua hơdră bruă mă jia blơi sĭ gơnam phara pioh pơgang tơlơi suaih pral mơnuih ƀôn sang, plai ƀiă blơi yua hơdôm mơta gơnam ƀu klă kơ tơlơi suaih pral kah hăng tơpai, biêr, hŏt djup./.