Tơdơi kơ 5 hrơi ha mơkrah mă bruă, mơguah lơ 29/9, Jơnum min apăn bruă Khua pơ ala mơnuih ƀôn sang dêh čar pơđut hĭ jơnum lok 49, hơmâo sem lăng 34 boh tơhnal, amăng anun hơmâo 13 črăn tơlơi phiăn prap mơ-it Khua pơ ala mơnuih ƀôn sang dêh čar tŭ yap mă yua amăng jơnum lok 10. Khua git gai pơ ala mơnuih ƀôn sang dêh čar ơi Trần Thanh Mẫn rơkâo djop anom bruă ječ ameč tŭ mă tơlơi pơgôp hiăp hơmâo bơtŭ ư laih, pơgiong hră lăi pơthâo mơ-it nao Khua pơ ala mơnuih ƀôn sang dêh čar  djơ̆ hrơi mông.

Jơnum lok 10, jơnum rơnuč mơng Khua pơ ala mơnuih ƀôn sang dêh čar tal XV, bruă lu biă mă, sem lăng hơdôm boh tơhnal tui tơđar rah, hăng lăng glăi rơwang ngă bruă hăng tŭ yap mă yua hơdôm tơlơi pơtrun, hơdră  bruă yôm phun kơ jơlan gah ngă bruă rơwang pơ anăp. Him lăng, Khua pơ ala mơnuih ƀôn sang dêh čar amra sem lăng, tŭ yap mă yua giăm 50 črăn tơlơi phiăn, tơlơi pơtrun, amăng anun hơmâo lu tơlơi pơtrun akŏ phun kiăng dưi mă yua hmao tlôn hơdôm tơlơi črâo trun phrâo mơng gơnong glông amăng pơtô pơjuăt, ia jrao hăng mut hrŏm jar kmar.