VOV4.Jarai - Tŏ tui hrơi mông jơnum bruă tơlơi phiăn blan 9, hrơi anai (21/9), Jơnum min apăn bruă Khua pơ ala mơnuih ƀon sang dêh čar pơgôp hiăp kơ bruă lăi pơthâo, tŭ mă, pơplih pơkra kơ črăn tơlơi phiăn khăm pơjrao tơlơi duam ruă (čih pơkra glăi). Tŭ mă hơdôm tơlơi pơgôp hiăp mơng Khua pơ ala mơnuih ƀon sang dêh čar amăng jơnum lok 3, truh ră anai črăn tơlơi phiăn khăm pơjrao (čih pơkra glăi) pơsit prăk duh lơ̆m khăm pơjrao tơlơi duam ruă hluai tui rơnoh prăk duh djơ̆ hăng hơdôm rơnoh prăk, lăp djơ̆ hăng tơlơi dưi laih dong pơsur klă dong amăn bruă mă, thâo yua măi mok.

Khua git gai pơ ala mơnuih ƀon sang dêh čar ơi Vương Đình Huệ nao jơnum bơkơtuai

Hlâo anun, amăng Jơnum Khua pơ ala mơnuih ƀon sang dêh čar, ƀing khua mua brơi thâo, kiăng hơmâo hơdră akŏ phun, phara brơi kơ bruă khăm pơjrao hăng bruă blơi gơnam tam mơng sang ia jrao, kiăng pơhlôm djơ̆ hăng tơlơi rơkâo amăng khăm pơjrao hăng dưi kơtưn ngă bơkơnar kơplah wah hơdôm hơdră khăm, pơjrao. Ƀing khua mua ăt brơi thâo: boh tơhnal ngă gun găn hloh hăng yôm hloh hăng gơnong bruă ia jrao ră anai lĕ bruă ngă hrŏm kơplah wah kơnuk kơna hăng anom bruă pơdong mă hơjăn, yua anun rơkâo lui hĭ tơlơi pơmĭn pơmut hrŏm amăng bruă ia jrao. Yua ƀu dưi blơi gơnam măi mok mă yua hrŏm, dưm amăng sang ia jrao kiăng kơ dưi khăm pơjrao ba glăi pơhrui hrŏm.

Siu Đoan: Pơblang