VOV4.Jarai - Tô̆ tui jơlan hơdră jơnum tui akô̆ bruă tơlơi phiăn blan 9, mơguah anai (22/9), Jơnum min apăn bruă Khua pơ ala mơnuih ƀôn sang dêh čar ta gum pơhiăp kơ Rơwang bruă Tơlơi phiăn lŏn drŏn (pơplih pơkra). Anai lĕ sa rơwang bruă Tơlơi phiăn prong, hmâo bôh tŭ yua, tơhnal yôm phăn amăng tơlơi hơdip bơwih ƀong huă – mơnuih mơnam mơng lŏn ia, hmâo bơdjơ̆ nao dơlăm truh lu mơta amăng tơlơi hơdip mơda bơwih ƀong huă mơnuih mơnam mơng lŏn ia.

Tui tơlơi pơkă hlâo, rơwang bruă Tơlơi phiăn anai amra dưi hmâo Khua pơ ala mơnuih ƀôn sang bơkơtuai, gum pơhiăp tal blung a amăng tal jơnum lok 4, Khua pơ ala mơnuih ƀôn sang tal 15. Hăng ƀirô ngă tui bruă wai lăng kơnuk kơna gah bruă lŏn drŏn, Khua Ding jum kông ngăn dlai tlô hăng rơhuông adai lŏn mơnai Trần Hồng Hà brơi thâo: Rơwang bruă Tơlơi phiăn lŏn drŏn (pơplih pơkra) anăp nao truh tơlơi pơkă pơhlôm pơsit nua lŏn pơdah rơđah, tơpă hăng djơ̆ tui nua pơkă hrom kiăng mơnuih ƀôn sang hăng anom bơwih ƀong dưi čơkă mă bôh tŭ yua. Ơi Trần Hồng Hà ăt lăi rơđah mơn, bruă lui khung pơkă nua lŏn jing kiăng biă hăng mă yua hră pơkă nua lŏn djơ̆ hăng nua pơkă hrom hloh./.

Siu H’ Prăk: Pơblang