VOV4.Jarai - Mơguah lơ 19/10, ƀơi tơring čar Bắc Ninh, Kơ-iăng Khua git gai pơ ala mơnuih ƀon sang dêh čar ơi Trần Thanh Mẫn git gai jơnum tal 4 Jơnum min gru grua, pơtô pơjuăt mơng Ƀirô Khua pơ ala mơnuih ƀon sang dêh čar.

Jơnum kiăng sem lăng, pơčrông sai, pơgôp hiăp kơ 4 boh tơhnal yôm phăn hơmâo: Hră lăi pơthâo boh than dưi ngă thun 2022 hăng prap lui bruă mă amăng thun 2023 mơng Jơnum min; hră lăi pơthâo pel ĕp sem lăng boh than ngă tui akŏ bruă pơđĭ kyar bơwih ƀong huă, mơnuih mơnam thun 2022; hră lăi pơthâo boh than krăo lăng, hơduah ĕp bruă ngă tui hơdră bruă, tơlơi phiăn amăng sa, dua boh tơhnal: Pơtô hrăm brơi čơđai muai ƀơi hơdôm sang măi pơkra pơjing; pơtô pơjuăt gưl prong; pơtô hrăm bruă mă hăng hră lăi pơthâo boh than kră lăng kơ bruă ngă tui hơdră bruă, tơlơi phiăn amăng pơgang hŭi ia ƀlung brơi čơđai.

Kơ-iăng Khua pơ ala mơnuih ƀon sang dêh čar ơi Trần Thanh Mẫn đĭ pơhiăp amăng mông jơnum

Đĭ pơhiăp git gai mông jơnum, Ding kơna Ding jum kơđi čar, Kơ-iăng Khua git gai pơ ala mơnuih ƀon sang dêh čar ơi Trần Thanh Mẫn rơkâo Jơnum min kiăng tŏ tui gir run, đing nao ngă pơgiong klă hloh hơdôm bruă jao hơmâo ba tơbiă amăng thun 2022, sit biă ñu lĕ bruă git gai, gum hrŏm pơphun truh kih Jơnum gru grua đơ đam dêh čar thun 2022.