Tui hăng hră lăi pơthâo, thun 2025, Dak Lăk hơmâo 4 hơnong pơkă bơwih ƀong akŏ phun rơgao hơnong, amăng anun prăk ba sĭ gơnam pơ čar rơngiao đĭ rơbêh 26% pơhmu hăng thun 2024; prăk pơhrui glăi hơmâo 18.208 klai, đĭ 28,56%; prăk pơhrui yap tui akŏ mơnuih hơmâo 80,6 klăk. Bruă wai lăng, djru tơlơi hơdip mơda hơmâo pơhlom mơn, hăng bruă ngă giong 100% hơnong pơkă man pơdong 2.800 boh sang kơ mơnuih tơnap tap dưi blơi hăng lŏm lui sang dŏ tơ̆i phô̆.

Mut amăng thun 2026 - thun pơphun brơi akŏ bruă đĭ kyar 2026-2030, Dak Lăk dưi ngă hơnong pơkă, đah mơ̆ng dưi đĭ kyar dua mrô; mrô hrŏ trun sang anŏ rin amăng đơđam tơring čar mơ̆ng 3%, kơnong ƀơi plơi pla djuai ania bbiă hrŏ trun mơ̆ng 4%; pơtrut pơplih bruă mă tui jơlan bơwih brơi - măi mok - man pơdong. Klah čun glăi mông jơnum, ơi Tạ Anh Tuấn, Khua Jơnum min mơnuih ƀôn sang tơring čar Dak Lăk lăi, abih bang anom bruă gong gai khŏm pơplih tơlơi pơmin, ngă bruă kơtang hloh, khut khăt mơtăm, glăm bruă truh kơ ngă giong, laih dong tañ brơi prăk ngă bruă dêh čar jao, jao bruă rơđah rơđông kơ rim pô tuh pơ alin, rim plơi pla hăng tañ pơsir brơi hơdôm kơčăo bruă ngă kaih.