Samơ̆, ăt hơmâo lu tơlơi tơnap tap, gun găn kiăng ječ ameč pơsir hĭ. Truh abih blan 10, tơring čar Dak Lak kah pơhrui prăk yua lŏn mơnai, mrô pơhrui glăi lĕ 1.364 klai prăk, dưm dưm 45,8% tui rơnoh Khul pơ ala mơnuih ƀôn sang tơring čar jao, amăng anun gưl tơring čar kơnong 1,2% tui tơlơi pơkă. Ba truh tơlơi anai lĕ hơdră pơplih aka ƀu ha amăng plĕ. Mah tơlơi phiăn lŏn mơnai thun 2023 dưi mă yua dong mơng lơ 1/7/2024 samơ̆ truh ră anai hơmâo sa, dua hơdră bruă bơdjơ̆ nao kơ bruă wai lăng pơhrui prăk jia lŏn mơnai aka ƀu hơmâo tơlơi pơtrun tong ten hăng tơlơi črâo ba.

Ơi Phạm Ngọc Nghị, Khua Jơnum min mơnuih ƀôn sang tơring čar Dak Lak rơkâo djop anom bruă bơdjơ̆ nao amăng tơring čar kơsem min tong ten hră pơ-ar hăng pơčrông sai hrŏm hơdră bruă kiăng pơsir hĭ tơnap tap. Hơdôm bruă tui tơlơi glăm ba, tơring čar amra gir run pơsir hĭ. Tơdai rơgao tơlơi glăm ba, hơdôm anom bruă kiăng pơphô bruă kiăng tơring čar mơ-it nao gơnong glông.