Amăng mông jơnum, ƀing khua mua đing nao sem lăng, lăng glăi bruă ngă tui bruă jao pơđĭ kyar bơwih ƀong huă-mơnuih mơnam, ling tơhan-wai pơgang rơnuk rơnua thun 2025 hăng pơčrông sai, pơsit jơlan gah, hơnong pơkă, bruă jao thun 2026. Tui lăi pơthâo mơng Jơnum min mơnuih ƀôn sang tơring čar, amăng thun 2025, mah lu tơnap tap, sit biă ñu bơdjơ̆ nao mơng kơthel mrô 13 hăng hơdôm tal hơjan ia ling dăo ngă rơngiă rơbêh 12.000 klai prăk, tơlơi bơwih ƀong huă-mơnuih mơnam amăng tơring čar Dak Lak ăt tŏ tui hơđong.

Tơring čar hơmâo 12/16 hơnong pơkă bơwih ƀong huă-mơnuih mơnam dưi ngă hăng ngă rơgao tơlơi pơkă; pơhrui rĭm akŏ mơnuih him lăng rơbêh 80 klăk prăk; pơhrui ngăn drăp truh 16.500 klai prăk; rơnoh sĭ mơdrô pơ tač rơngiao truh 2,8 klai đôlar Mi, đĭ 26% pơhmu hăng thun 2024. Hơdôm bruă gru grua-mơnuih mơnam tŏ tui hơmâo đing nao, bruă djru brơi mơnuih mơnam hơmâo pơhlôm, mrô sang anŏ ƀun rin hrŏ mơng 3% pơ glông, kơnong sang anŏ ƀun rin djuai ania ƀiă hrŏ rơbêh 4%. Bruă ling tơhan-wai pơgang rơnuk rơnua hơmâo pơhlôm kjăp.