Jơnum min mơnuih ƀôn sang tơring čar Gia Lai phrâo ba tơbiă tơlơi pơtrun brơi kông ti TNHH tuh pơ alin hăng wai lăng sang Ion Complex (ƀôn prong Hà Nội) lĕ anom bruă tuh pơ alin man pơkra tơdron taih golf Đak Đoa, hăng abih tih prăk tuh pơ alin rơbêh 1.150 klai prăk. Akŏ bruă tơdron taih golf Đak Đoa hơmâo pok pơhai ƀơi kual lŏn bơwih bơwang djop mơta Đak Đoa, hrơi blan man pơkra amăng rơwang tal I-2026 truh rơwang tal IV-2029, thun blan mă yua amăng 50 thun.

Jơnum min mơnuih ƀôn sang tơring čar Gia Lai jao gơnong bruă ngă hmua hăng ayuh hyiăng lŏn mơnai git gai pel ĕp glăi, ngă hră pơ-ar jao lŏn, brơi yua apah lŏn mơnai djơ̆ tơlơi pơkă amăng tơlơi phiăn, amăng anun kual glai kyâo hngo hăng hơdôm prăk kak bơdjơ̆ nao mơ̆ anom bruă tuh pơ alin duh amăng ngăn drăp lơm dưi man pơkra. Djop gơnong bruă, sang bruă bơdjơ̆ nao hăng Jơnum min mơnuih ƀôn sang să Đak Đoa amra gơgrong gum hrŏm, krăo lăng, črâo ba anom bruă tuh pơ alin ngă djop hră pơ-ar amăng tuh pơ alin, lŏn mơnai, man pơdong, dưm dăp, wai pơgang jum dar, pơgang apui ƀong, pơhlôm rơnuk rơnua.