Rơwang thun 2021-2026, Khul khua pơ ala mơnuih ƀôn sang tơring čar Dak Lăk mă bruă amăng hrơi blan glăk dưm dăp, pơmut anom bruă gưl tơring čar, hăng lu tơlơi pơplih phrâo kơ anom bruă kơnuk kơna hăng hơdră ngă bruă. Amăng rơwang ngă bruă, hơmâo pơtrun giăm 1.000 tơlơi pơtrun amăng djŏp bruă mă.

Anŏ klă mơ̆ng tơlơi pơtrun anai jai đĭ tui, kiăo tui tơlơi hơmâo sit, hmao kru pơkôl pơkă djŏp tơlơi pơtrun mơ̆ng Ping gah hăng mơ̆ng Ping gah tơring čar, pơjing anih ngă tui tơlơi phiăn, pơtrut đĭ kyar bơwih ƀong huă - mơnuih mơnam, pơhlom pơgang lŏn ia - rơnuk rơnua. Ƀơi mông jơnum, ơi Lương Nguyễn Minh Triết, Khua ping gah tơring čar Dak Lăk pơpŭ bơni hơdôm boh than yom mơ̆ Jơnum min pơ ala mơnuih ƀôn sang tơring čar hơmâo ngă amăng rơwang bruă rơgao. Laih dong kiăng Jơnum min pơ ala mơnuih ƀôn sang pơplih phrâo, pơđĭ tui anŏ klă bruă mă, pơtrut tui tơlơi tơlơi gơgrong bruă mơ̆ng anom bruă yua ană plơi ruah đĭ, djơ̆ hăng tơlơi kiăng đĭ kyar mơ̆ng tơring čar pơ anăp anai./.