Bơdjơ̆ nao bruă rơdêh pơjrŏm ngă djai mơnuih ƀơi tơring glông Chư Pưh, tơring čar Gia Lai ngă 3 čô mơnuih amăng grup đă boh lông HAGL djai, lơ 13/8, ơi Khuất Việt Hùng-Kơ-iăng khua Jơnum min wai lăng jơlan glông dêh čar hơmâo mông mă bruă hăng Jơnum min mơnuih ƀôn sang tơring glông Chư Pưh kơ bruă pơhlôm hơđong amăng jơlan dêh čar mrô 14, ară jơlan găn nao tơring glông hăng hơmâo nao tơña bla sang anŏ hơmâo mơnuih bưp tơlơi truh sat. Tui lăi pơthâo, mơng akŏ thun truh ră anai, ƀơi tơring glông hơmâo 13 wŏt rơdêh pơjrŏm, ngă 10 čô mơnuih djai, 4 čô rơka rơkač. Sit biă ñu tơlơi truh sat kơtang hloh juăt ƀuh ƀơi 31 km, ară jơlan dêh čar mrô 14 găn nao tơring glông.

Đĭ pơhiăp amăng mông mă bruă, ơi Khuất Việt Hùng rơkâo Jơnum min mơnuih ƀôn sang tơring glông Chư Pưh pơkiăo nao tơhan djru pơsir hĭ tañ ƀơi anih rơdêh pơjrŏm laih rơgao, laih anun pel ĕp, anom bruă bơdjơ̆ nao tơring čar Gia Lai pơsir hĭ khăt khăt hơdôm bruă ngă soh. Tơring glông kiăng pok pơhai tañ bruă dưm camera wai lăng rôk jơlan. Jơnum min wai lăng jơlan glông čang rơmang tơring čar Gia Lai hơmâo hơdră bruă sui pơ anăp kiăng dưm dăp mơnuih dŏ hơdip rôk jơlan dêh čar mrô 14 kiăng pơhlôm rơnuk rơnua lơm găn nao rai.