Ƀơi mông jơnum, djop ding jum, anom bruă, tơring čar hơmâo pơblang tong ten hăng rơkâo pơblih hơdôm tơlơi gun, pơrơkua nao rai amăng hră tơlơi phiăn pơtrun ngă tui hăng tơlơi pơđĭ kyar bơwih ƀong huă, mơnuih mơnam. Tơlơi rơkâo đĭ amăng mông jơnum, lăi rơđah djop anom bruă, mơnuih ngă khua hơmâo tơlơi čih kĭ hră tơlơi phiăn pơtrun hăng djop sang bruă pơdjơ̆ nao khom glăm ba, kơsem min, mă yua boh tơhnal jŭ yap glăi Hră lăi pơthâo mơ̆ng Kơnuk kơna kơ boh tơhnal jŭ yap djop hră pơar tơlơi phiăn pơtrun, kiăng ƀuh tong ten anŏ pơkă dŏ pơrơkua nao rai, anŏ aka ƀu găl, anŏ kơƀah pioh čih ming pơkra glăi kiăng djơ̆ găl hloh amăng hơdrôm hră tơlơi phiăn dêh čar.

Klah čun ƀơi mông jơnum, Kơ-iăng khua dêh čar ơi Lê Minh Khái rơkâo Khul čih pơkra tơlơi phiăn ăt hmư̆ hiăp djru pơgôp hrŏm ngă giong hră lăi pơthâo hlâo kơ lơ 26/9 pơdah đĭ hăng kơnuk kơna pơsit laih anun lăi pơthâo hăng khua mua pơ ala mơnuih ƀôn sang dêh čar amăng mông jơnum lok 6 pơ anăp.