Jơnum anai yua Sang hră kơsem min bruă đah kơmơi Việt Nam hăng sang hră gưl prong Chonnam Hàn Quốc ngă hrŏm pơphun, hơmâo lu mơnuih rơgơi kơhnâo mơ̆ng Việt Nam, Thai Lan hăng Khač jơnum hrŏm. Tui hăng tơlơi lăi pơthâo mơ̆ng Anom wai lăng bruă đuăi hyu dŏ ƀơi jar kmar thun 2022, amăng rŏng lŏn tơnah hơmâo 281 klăk čô mơnuih đuăi hyu dŏ pơ tač rơngiao thun 2020, dưm dưm hăng 3,6% mrô mơnuih amăng rŏng lŏn tơnah. Mrô mơnuih đuăi hyu dŏ ƀơi jar kmar đĭ tui na nao amăng 50 thun hăng anai.

Khă tui anun, hrŏm hăng dŏ lu tơlơi pơdjơ̆ nao mơnuih đuăi hyu dŏ kah hăng: Tơlơi dŏ dong ƀong huă, tơlơi rơnuk rơnua lơ̆m đuăi hyu dŏ hăng tơlơi rơnuk rơnua hyu mă bruă apah brơi kơ mơnuih đuăi hyu dŏ. Anai lĕ hơdôm tơlơi kiăng đing nao kơsem min lu hloh. Yua kơ anun, ƀơi mông bơkơtuai anai, ƀing mơnuih rơgơi kơhnâo, ƀing khua mua pơ ala mơ̆ng Việt Nam, Hàn Quốc, Thai Lan hăng Khač pơtum nao pơčrong sai 4 boh yôm phun hơmâo: Đuăi hyu dŏ hăng hơdôm tơlơi pơdjơ̆ nao tơlơi đah rơkơi hăng đah kơmơi; Đuăi hyu dŏ hăng bruă pơgang tơlơi suaih pral; Đuăi hyu dŏ pơdjơ̆ nao bruă pơhlôm nua mơnuih mơnam; Lu tơlơi pơkŏn pơdjơ̆ nao kơ khul mơnuih đuăi hyu dŏ ƀơi tač rơngiao.