VOV4.Jarai - Tlam lơ 3/10, ƀơi Hà Nội, Ding jum tuh tia pơkra pơjing hăng sĭ mơdrô gum hrŏm hăng Khul mơnuih bơwih ƀong sĭ mơdrô kual Mi kô̆ ƀơi Việt Nam pơphun jơnum hăng ƀing mă tơlơi pơhing phrâo kiăng lăi pơthâo kơ Jơnum khua mua hăng pơdă prưng bơwih ƀong huă mơtah thun 2022. Pơphun dong mơng lơ 28-30/11 ƀơi ƀôn prong Hồ Chí Minh, Jơnum khua mua hăng pơdă prưng bơwih ƀong huă mơtah thun 2022 ba glăi tơlơi yôm phăn amăng bruă ngă tui hơdôm tơlơi pơčeh phrâo amăng pơđĭ kyar hơđong kjăp lăp djơ̆ hăng tơlơi pơkôl kơplah wah Việt Nam - Khul pơlir hơbit kual Mi kô̆, pơgôp ngă tui hơdră bruă dêh čar amăng kơtưn mơtah amăng dêh čar Việt Nam. Hrơi pơdă prưng bơwih ƀong mơtah amra lăi pơthâo, pơdă prưng hơdôm măi mok phrâo, gơnam tam hiam phrâo, hơdôm tơlơi pơčeh phrâo hăng hơdôm hơbô̆ bơwih ƀong mơtah, bơwih ƀong rô nao rai kơplah wah hơdôm anom bơwih ƀong sĭ mơdrô kual Mi kô̆ hăng Việt Nam. Hrŏm hăng anun hơdôm jơnum hăng tal pơčrông sai amăng hrơi mông pơdă prưng amra lĕ akŏ phun kiăng kơtưn ngă hrŏm kơplah wah anom bơwih ƀong sĭ mơdrô kual Mi kô̆ hăng Việt Nam, pơgôp pơtrut bơwih ƀong huă Việt Nam mơtah, hơđong kjăp hluai tui bruă pơlăi nao rai, pơčeh phrâo hăng črâo ba mă yua boh thâo phrâo.

VOV/Siu Đoan: Pơblang