VOV4.Jarai-Mơguah lơ 14/10, ƀơi Sang bruă ping gah dêh čar, Khua git gai ping gah dêh čar ơi Nguyễn Phú Trọng git gai jơnum hăng hơmâo tơlơi pơhiăp yôm brơi pok pơhai ngă tui Hră pơtrun mơ̆ng Ding jum kơđi čar kơ bruă pơđĭ kyar kual Dap Kơdư truh thun 2030 lăng nao pơ thun 2045. Kual Dap Kơdư hơmâo 5 boh tơring čar Kon Tum, Gia Lai, Dak Lak, Dak Nông hăng Lâm Đồng dưi thâo kah hăng sa kual lŏn hri đưm, anih hơmâo truh 6 klăk čô mơnuih mơ̆ng 53/53 djuai ania ƀiă amăng dêh čar.

Mông jơnum abih bang

Pơhiăp git gai jơnum, Khua git gai ping gah ơi Nguyễn Phú Trọng lăi pơtong: Kual Dap Kơdư lĕ anih anom yôm biă mă kơ tơlơi bơwih ƀong huă, mơnuih mơnam, ayuh hyiăng, pơgang glai klô, rơnuk rơnua hơđong hăng bruă pơtom hiăp ƀơi dêh čar ta. Pơđĭ kyar kual Dap Kơdư, kiăng hơđong lĕ jơlan hơdră prong mơ̆ng Ping gah, Kơnuk kơna hăng jing bruă mă yôm ƀơi dêh čar. Man pơdong hăng pơđĭ kyar kual Dap Kơdư khom ngă hrom mơak klă kplah wah pơđĭ kyar bơwih ƀong huă, gru grua thâo thăi mơnuih mơnam, pơgang kông ngăn lŏn glai, ayuh hyiăng, lir hơbit kjăp hăng bruă pơgang hơđong rơnuk rơnua laih anun kơtưn bruă pơtom hiăp. Mă bruă pơđĭ kyar bơwih ƀong huă, gru grua, mơnuih mơnam ngă atur kơ bruă pơgang rơnuk rơnua, hơđong dêh čar, kơđi čar-mơnuih mơnam.

Nay Jek: Pơblang