Tui hăng tơlơi lăi pơthâo hlâo thun 2022 hăng 9 blan thun 2023, rơnoh prăk kơ bruă pơsur tuh tia pơkra ming ƀơi 15 boh tơring čar kual Tong krah-Dap Kơdư lĕ 115 klai prăk. Amăng anun, rơnoh prăk pơsur bruă tuh tia pơkra ming dêh čar pơpha kơ djop tơring čar lĕ 56 klai prăk, dŏ glăi tơring čar tuh pơ alin mă.

Tui hăng tơlơi pơtong lăng mơ̆ng anom bruă tuh tia pơkra ming hăng sĭ mơdrô, Ding jum tuh tia pơkra ming hăng sĭ mơdrô lăi, bruă mă pơsur tuh tia pơkra ming mơ̆ng 15 boh tơring čar kual Tong krah-Dap Kơdư dưi pok pơhai lu hơdră, lu mơta djơ̆ hăng anŏ gêh găl amăng kual laih anun hơdôm blan rơnuč thun 2023, djop tơring čar pơtum nao kơ bruă mă phun kah hăng: krăo lăng, pơtrut pơsur ngă tui hơdôm kơčăo bruă djru djơ̆ hrơi blan pơkă, kơtưn pơtô brơi, pel ĕp, krăo lăng hăng hmao kru pơsir tơlơi dŏ gun lơ̆m pok pơhai kơčăo bruă pơtrun.