Tui anun, amăng 2 hrơi (25-26/3/2026), rơbêh 90 čô khua dưi ruah amăng Ƀirô khua pơ ala mơnuih ƀôn sang dêh čar tal XVI mơ̆ng 15 boh tơring čar, ƀôn prong kual Tong Krah hăng Dơnung amra hơmâo pơtŏp hrăm, sem lăng hơdôm tơlơi tum teč akŏ phun kơ Ƀirô khua pơ ala mơnuih ƀôn sang; pơƀuh, lăi pơthâo kơ bruă Pơplih boh thâo mrô hăng mă yua glông phần mền bơwih brơi bruă mă mơ̆ng Ƀing khua pơ ala, pơtô mă yua App Quốc hội mrô 2.0; Tơlơi rơgơi sem lăng, pơgôp hiăp čih tơlơi phiăn mơ̆ng ƀing pơ ala mơnuih ƀôn sang dêh čar; Tơlơi thâo rơgơi bưp mơnuih ƀôn sang mơ̆ng ƀing khua pơ ala; Tơlơi thâo rơgơi bưp ƀing čih tơlơi pơhing phrâo mơ̆ng ƀing khua pơ ala.

Pơhiăp git gai mông Jơnum, Thượng tướng Trần Quang Phương - Kơ-iăng khua pơ ala mơnuih ƀôn sang dêh čar lăi, bruă ruah khua pơ ala mơnuih ƀôn sang dêh čar hăng khua pơ ala djŏp gưl rơwang thun 2026-2031 truh kih hiam laih, sit jing gru kơđŏm mriah ƀhêm amăng bruă akŏ pơdong tơlơi dưi mơnuih ƀôn sang ngă pô xã hội chủ nghĩa mơ̆ng čar ta. Hăng mrô mơnuih nao plĕ hră lu hloh mơ̆ng hlâo truh ră anai, hơmâo truh 99,7%, mơnuih ƀôn sang ruah mă djŏp 500 čô khua pơ ala mơnuih ƀôn sang dêh čar tal XVI. Hăng pran jua ngă bruă glăm prong, đăo kơnang khut, mơnuih ƀôn sang pơsit tơlơi pơmin khăng khŏp nao hrŏm hăng Ping gah, Kơnuk kơna, biă ñu mơit tơlơi čang rơmang prong hăng tơlơi pơplih prong mơ̆ng Khua mua pơ ala tal phrâo, laih anun tơlơi gơgrong bruă, tơlơi rơgơi mơ̆ng rim čô khua pơ ala./.