Tlam anai (lơ 11/5), ƀơi Anih Jơnum Dêh čar Mỹ Đình, Hà Nội, pơphun jơnum prăp lui hlâo kơ mông Jơnum ruah khua Jơnum min djŏp djuai ania mơnuih mơnam Việt Nam tal XI, rơwang thun 2026-2031. Hăng anăn “Gum pơgôp - Dưi ngă pô - Pơplih phrâo - Pơčeh ia rơgơi - Đĭ kyar”, Jơnum anai hơmâo pơphun mơ̆ng lơ 11 truh 13/5, jing bruă kơđi čar - mơnuih mơnam yom biă, pok rai kơ rơwang bruă phrâo mơ̆ng Jơnum min djŏp djuai ania mơnuih mơnam Việt Nam amăng hrơi mông hơdôm khul grup kơđi čar - mơnuih mơnam laih anun khul grup mơnuih ƀôn sang yua Ping gah, Kơnuk kơna jao bruă hơmâo pơmut amăng Jơnum min djŏp djuai ania mơnuih mơnam Việt Nam laih wai lăng. Nao pơhmư̆ mông jơnum hơmâo rơbêh 1.300 čô khua, amăng anun hơmâo 1.138 čô khua sit nik, anun lĕ Ding kơna Jơnum min djŏp djuai ania mơnuih mơnam Việt Nam tal X; khua mua yua Jơnum min djŏp djuai ania mơnuih mơnam djŏp tơring čar, ƀôn prong hăng hơdôm khul grup ding kơna ruah nao jơnum; ƀing khua hơmâo pơkiăo nao pơhmư̆; mơnuih Việt Nam dŏ pơ čar rơngiao hăng ƀing khua mơ̆ng Jơnum min djŏp djuai ania ngă bruă sit nik.

Hră pơthâo bruă kơđi čar kơ mông Jơnum hơmâo anăn “Pơđĭ tui tơlơi gơgrong akŏ phun bruă kơđi čar mơ̆ng Jơnum min djŏp djuai ania mơnuih mơnam Việt Nam amăng bruă pơtrut tui tơlơi dưi ngă pô mơ̆ng mơnuih ƀôn sang, gru khăp kơ lŏn ia, pran kơtang mơ̆ng tơlơi gum pơgôp djuai ania, akŏ pơdong lŏn ia đĭ kyar kjăp phik, thâo rơgơi, yâo mơak”. Ƀơi mông jơnum prăp lui hlâo tlam anai, bing khua hơmâo jơnum pơčrông ruah Khul git gai mông jơnum, Khul čih pioh hră pơ-ar, tŭ ư jơlan hơdră ngă bruă, tơlơi pơkă ngă bruă; lăi pơthâo glăi mrô khua nao Jơnum; lăng glăi djŏp bruă, tơlơi aka ƀu ngă, bruă kiăng ngă pơ anăp mơ̆ng Jơnum min djŏp djuai ania mơnuih mơnam gơnong dlông, Khul git gai hăng Khul khua Jơnum min djŏp djuai ania mơnuih mơnam Việt Nam rơwang thun 2024-2026; sem lăng Hră čih pơkra, pơhrua tui Črăn tơlơi pơkă mơ̆ng Jơnum min djŏp djuai ania mơnuih mơnam Việt Nam./.