Anai lĕ jơnum rơnuč thun kiăng lăng glăi bruă ngă tui tơlơi pơtrun mơng Khul pơ ala mơnuih ƀon sang tơring čar amăng pơđĭ kyar bơwih ƀong huă-mơnuih mơnam thun 2023, ba tơbiă bruă jao, hơdră ngă tui amăng thun 2024 hăng pơgôp hiăp amăng lu jơlan hơdră, akŏ bruă akŏ phun amăng tơring čar. Him lăng jơnum pơphun amăng 3 hrơi. Amăng mông jơnum anai, Khul pơ ala mơnuih ƀon sang tơring čar Dak lak ăt sem lăng hơdôm hră lăi pơthâo kơ bruă pơgang, pơgăn ƀing ngă soh tơlơi phiăn amăng tơring čar, bruă pơgăn hưp ƀong kông ngăn, pơsir kơđi tơlơi, hmư̆ Jơnum min djop djuai ania mơnuih mơnam Việt Nam tơring čar lăi pơthâo kơ bruă mut hrŏm pơjing gong gai, sem lăng tơlơi lăi glăi, pơsir hĭ khut khăt tơlơi rơkâo mơng mơnuih ƀon sang hăng pơphun jơnum bơkơtuai.

Đĭ pơhiăp amăng mông jơnum, Huỳnh Thị Chiến Hoà, Khua khul pơ ala mơnuih ƀôn sang tơring čar Dak Lak brơi thâo: hơdôm tơlơi pơgôp hiăp hăng tơlơi pơsit amăng mông jơnum amra jing akŏ phun kiăng pơtrut pơđĭ kyar bơwih ƀong huă-mơnuih mơnam, pơhlôm wai pơgang rơnuk rơnua, pơjing anih anom kơđi čar ƀơi ƀon lan amăng thun 2024 hăng hơdôm thun pơ anăp.