Amăng mông jơnum ƀing khua mua hơmâo pơgôp hiăp kơ glông jơlan čih pơkra tơlơi phiăn mơng Khua pơ ala mơnuih ƀôn sang dêh čar tal XVI; tui akŏ bruă him lăng ngă “Hơdră bruă pơgiong črăn tơlơi phiăn Việt Nam amăng rơwang phrâo”; Hră lăi pơthâo bruă mă kơ tơhnal pơkă, hơdră bruă, jơlan pơsir pơprong kiăng dưi ngă tui hơdôm tơlơi črâo trun, jơlan gah mơng Ping gah kơ pơđĭ kyar bơwih ƀong huă mơnuih ƀôn sang ngă pô tui tơlơi pơtrun mrô 68 mơng Ding jum kơđi čar; hră lăi pơthâo bruă bơdjơ̆ nao tơhnal pơkă, hơdră bruă, jơlan pơsir pơprong kiăng ngă tui tơlơi črâo trun mơng Ping gah amăng pơhlôm mơnong ƀong huă hơdjă; hră lăi pơthâo boh tơhnal bruă mă pơgiong tơhnal pơkă, tơlơi phiăn amăng hrơi blan rơgao hăng jơlan gah, bruă jao akŏ phun pơ anăp anai.

Pơđut mông jơnum, Khua git gai Ping gah ơi Tô Lâm rơkâo hơdôm anom bruă tŏ tui kơsem min, tŭ mă djop tơlơi pơgôp hiăp mơng Ding kơna Khul djru bruă Khul git gai hăng ƀing khua mua nao jơnum kiăng pơplih pơkra, pơgiong hơdôm boh tơhnal hơmâo lăi pơthâo, pơhlôm brơi kơ klă, djơ̆ hrơi mông rơkâo. Khua git gai Ping gah rơkâo, kơ črăn akŏ bruă čih pơkra tơlơi phiăn mơng Khua pơ ala mơnuih ƀôn sang dêh čar tal XVI, amăng hrơi mông pơkă akŏ bruă anai, kiăng đing nao biă mă kơ bruă ngă tui mơtăm amăng thun 2026 hơdôm boh tơhnal akŏ phun, yôm phăn mơng hră pơtrun mơng Jơnum ruah khua mua đơ đam dêh čar tal XIV mơng Ping gah.