Amăng lơ amăng mơguah lơ 19/1, ƀơi Sang jơnum prong dêh čar (Hà Nội), Jơnum ruah khua mua đơ đam dêh čar tal XIV mơng Ping gah Cộng sản Việt Nam jơnum prap lui. Hlâo kơ mông pơphun jơnum prap lui, ƀing khua mua nao Jơnum hơmâo mut nao čuă pơsat jĕp khua mir sir Hồ Chí Minh, dưm guang bơnga hăng tŭ ñang ƀơi Gong kut tơhan djai pơsăn drơi. Abih bang pioh ha mơnit hơ-ŭ hơdor kơ Khua git gai Ping gah hơđăp ơi Nguyễn Phú Trọng hăng ƀing Ding kơna Khul apăn bruă Ping gah tal XIII rơngiă laih.

Ơi Trần Thanh Mẫn, Ding kơna ding jum kơđi čar, Khua git gai pơ ala mơnuih ƀôn sang dêh čar pơ ala brơi khua mua Ping gah, kơnuk kơna git gai mông jơnum prap lui. Jơnum hơmâo bơtŭ ư ngă tui jơlan hơdră jơnum prap lui, tơhnal pơkă mă bruă mơng Jơnum, Jơlan hơdră bruă mă mơng Jơnum hăng tơlơi pơkă plĕ hră amăng Jơnum ruah khua mua đơ đam dêh čar tal XIV mơng Ping gah. Jơnum hơmao ruah Khul khua git gai hơmâo 16 čô Ding kơna ding jum kơđi čar; ruah khul čih pioh hơmâo 5 čô hăng khul pel ĕp kar hăng khua mua nao Jơnum hơmâo 13 čô. Jơnum hơmâo bơtŭ ư hăng khua mua nao jơnum hăng abih tih 1.586 čô khua mua nao Jơnum.