Jơnum ruah khua apăn bruă ping gah amăng anom bruă Kơnuk kơna dêh čar tal I, rơwang bruă thun 2025-2030 amra pơphun 2 hrơi,  mơ̆ng lơ 12-13/10/2025. Amra hơmâo 453 čô khua pơ ala brơi 209 rơbâo čô mơnuih ping gah amăng 2.211 boh sang bruă, khul ping gah yua Kơnuk kơna dêh čar wai lăng.

Jơnum ruah khua ping gah amăng sang bruă kơnuk kơna tal sa, rơwang bruă thun 2025-2030 lĕ jơnum ruah khua blung mơ̆ng Ping gah Kơnuk kơna dêh čar pơphun tui hơdră phrâo.

Hăng anŏ kiăng ngă “Gum pơgôp ngă bruă tơpă-ngă khua pô pơblih phrâo-Pơblih kơtang pơđĭ kyar-Jĕ giăm mơnuih ƀôn sang”, Jơnum anai amra pơƀut bruă mă, lăng pơtong boh tơhnal dưi ngă amăng rơwang bruă laih rơgao thun 2020-2025, sem glăi bruă mă git gai mơ̆ng khua mua, tơlơi pơčrâo ba mơ̆ng Khul apăn bruă ping gah kơnuk kơna rơwang bruă thun 2020-2025; pơtong rơđah anăp či ngă bruă, tơhnal pơkă, bruă mă phun, hơdră pơsir rơwang bruă thun 2025-2030; pơčrong sai, pơgôp hiăp kơ hră pơtrun mơ̆ng Gơnong dlông pioh ba pơdah thâo Jơnum ruah khua ping gah dêh čar tal 14 pơ anăp.