Jơnum anai pơƀut lăng glăi abih bang bruă ngă tui Tơlơi pơtrun rơwang thun 2020-2025, pơsit bruă kiăng ngă, hơdră ngă bruă kơ rơwang thun 2025-2030; laih dong pơgôp hiăp kơ Hră pơtrun Jơnum ping gah dêh čar tal 14. Lăp đing nao, Jơnum tal anai ƀu ruah ping gah tal phrâo ôh mơ̆ yua Ding jum kơđi čar ruah đĭ.

Hăng akŏ bruă: “Akŏ pơdong Ping gah hăng anom bruă čar mă bruă tơpă sit, kjăp kơtang; pơtrut gru grua hiam, pran gum pơgôp kơtang mơ̆ng abih bang mơnuih; bong kjăp, hơđong rơnuk rơnua lŏn ia; pơtrut mă yua boh thâo ia rơgơi; pơhrui abih djŏp tơlơi gêh gal či akŏ pơdong Gia Lai đĭ kyar”, tơring čar kiăng GRDP đĭ 10-10,5%/thun, GRDP yap tui akŏ mơnuih hơmâo 6.300-6.500 USD; truh thun 2030, pơhrui glăi kơ kơnuk kơna hơmâo rơbêh 41.000 klai prăk.