Nao jơnum hrŏm hơmâo rơbêh 1.100 čô mơnuih pơ ala kơ rơbêh 11 klăk čô mơnuih mut phung amăng dêh čar. Anai lĕ tơlơi jơnum prong mơ̆ng khul ngă kông ñơn, mơnuih mut phung juăt lăi mơnuih tơpuôl, pok pơhai rơnuk pơđĭ kyar phrâo mơ̆ng anom bruă mơnuih tơpuôl. Jơnum ruah khua tal 13 Mơnuih tơpuôl Việt Nam hơmâo bruă mă, pơtong glăi boh tơhnal ngă tui Hră pơtrun jơnum ruah khua tal 12, laih anun pơtong rơđah bruă mă rơwang bruă phrâo tal 13 mơ̆ng thun 2023-2028; ruah khua apăn bruă mơnuih tơpuôl Việt Nam tal 13.

Rơwang bruă rơgao thun 2018-2023, Mơnuih tơpuôl Việt Nam hơmâo čih pơkra hăng ngă tui lu bruă mă, hơdră bruă djru mơnuih tơpuôl, mơnuih mă bruă apah mut phung hăng sang anŏ mơnuih mă bruă apah bơbeč yua kơ tơlơi truh klin kheng Covid 19 ngă hăng rơnoh prăk giăm 6 rơbâo klai prăk; rơbêh 30 klăk wơ̆t mơnuih tơpuôl, mơnuih mă bruă apah tơnap tap dưi nao čuă jơmư juh alum, djru ba mơnong ƀong huă ngă yang thun phrâo ƀong têt kiăng jơngum mơak hăng rơnoh prăk rơbêh 28 rơbâo klai.