Hlâo anun, amăng hrơi tom brơi (21/1), Jơnum tŏ tui mă bruă ha hrơi ƀơi Sang jơnum kiăng pơčrông sai kơ hơdôm črăn hră pơsit jơnum. Amăng mông jơnum mơguah, hơmâo laih 15 čô khua mua amăng hơdôm grup khua pơ ala, hơdôm anom bruă hơmâo tơlơi pơgôp hiăp. Mông jơnum yang hrơi tlam, hơmâo 15 čô khua mua amăng hơdôm grup khua pơ ala, hơdôm anom bruă đĭ pơgôp hiăp. Hơdôm tơlơi pơgôp hiăp đing nao hơdôm boh tơhnal akŏ phun amăng hră pơsit hăng hơdôm bruă akŏ phun hơmâo mơnuih ƀôn sang, ƀing apăn bruă, mơnuih Ping gah đing nao. Mông pơčrông sai pơphun dik dak, tơpă sit, ngă pô.

Khul git gai Jơnum tŭ mă, lăng yôm hơdôm boh tơhnal pơčrông sai hăng tơlơi pơgôp hiăp abih pran jua, tơlơi thâo thăo mơng ƀing khua mua; laih dong, git gai khul čih pơkra hră pơsit lăng glăi, tŭ mă hơdôm pơgôp kiăng pơgiong črăn hră pơsit mơ-it Jơnum tŭ yap. Hăng hơdôm tơlơi rơkâo tong ten, yôm phara, Khul git gai pơtum pơƀut glăi, tŭ mă, mơ-it nao Khul apăn bruă Ping gah tal XIV sem lăng, čih pơkra amăng hơdôm tơlơi pơtrun bruă phara, jơlan hơdră bruă mă ngă tui tơlơi pơtrun hăng pơgiong boh tơhnal tơlơi pơtrun Jơnum tal XIV mơng Ping gah. Khul git gai tơdơi kơ mă tơlơi pơgôp hiăp mơng khua mua hơmâo lăi pơthâo Jơnum kơ bruă pơplih jơlan hơdră mă bruă Jơnum tal 14 mơng Ping gah. Ƀing khua mua tŭ ư hăng bruă pơphun tañ ƀiă dŏ 1,5 hrơi mă bruă pơhmu hăng jơlan hơdră prap lui hlâo anun.