Hlâo kơ anun, tlam tom brơi, lơ 20/01, jơnum pơčrong sai amăng grup, djop khul pơ ala nao jơnum hơmâo pơphun tong ten, tơpă hnơ̆ng, gơgrong ba, tơlơi pơmin rơgơi hăng tơpă sit. Lu tơlơi pơgôp hiăp pơblang rơđah hơdôm tơlơi pơprong ba tơbiă hăng bruă pơtrut pơđĭ kyar lŏn ia amăng črăn phrâo, mơ̆ng bruă ngă giong tơlơi phiăn pơkă, pơblih sang bruă, khul mơnuih apăn bruă, pơđĭ tui tơlơi thâo git gai lŏn ia, truh kơ bruă pơblih ba yua mrô, ia rơgơi phrâo, pơđĭ kyar kơtang, pơčeh phrâo ia rơgơi, djru pơtrut pơđĭ ktar kơjăp, lir hơbit hăng ngă tui tơlơi thâo rơguăt phrâo hăng bơkơnar mơnuih mơnam.

Djru pơgôp hiăp nao amăng hră pơtrun, lu khua pơ ala lăi pơtong, kiăng pơblih phrâo tơlơi pơmin git gai, pơpha bruă mă tui hăng anăp pơđĭ kyar, lăng kơ ană mơnuih jing anŏ phun, laih dơ̆ng khom pơsir khut khăt anŏ ngă kơđông, tơlơi gun kiăng pơtrut kơtang pơblih tơlơi bơwih ƀong huă. Hơdôm tơlơi pơgôp hiăp hơmâo lăi pơthâo rơđah tơlơi kiăng khut khăt amăng bruă kơđi čar, tơlơi gơgrong ba ƀơi anăp ping gah, ƀơi anăp mơnuih ƀôn sang, djru hrŏm ngă pơgiong hĭ abih bang hră pơtrun pioh pơsit amăng tal jơnum prong ruah khua ping gah dêh čar tal anai, kiăng ngă djơ̆ tơhnal pơkă pơđĭ kyar lŏn ia amăng rơnuk hrưn đĭ phrâo.

Akŏ tơlơi Jơnum ruah khua ping gah dêh čar tal 14: “Yŭ hla gru hing ang mơ̆ng Ping gah, ha pran jua ngă truh kih djŏp hơnong pơkă đĭ kyar lŏn ia truh pơ thun 2030; prăp mă pô jơlan ngă bruă, khin pơmin, khin ngă, kjăp tơkai hơyak amăng rơnuk hrưn đĭ mơ̆ng pô mơ̆ng djuai ania ta...”.Anai jing tal blung a bruă Jơnum ruah khua lăi dlăm kơ tơlơi kơtưn ngă pô prăp rơmet mă djŏp bruă mơ̆ng djuai ania ta, pơƀuh pran jua mut hrŏm dlăm biă hăng čar rơngiao samơ̆ ăt djă pioh hnong đôč gru grua hiam hăng kjăp tơlơi rơngai.

Rơngiao kơ anun, bruă “Gum pơgôp - Ngă pô - Hơmâo tơlơi pơkă - Pơplih prong - Đĭ kyar” hơmâo pơhrua tui jing “Tơlơi pơplih prong”. Tơlơi anai pơƀuh pran jua gir kơtir ƀu kơnong ngă hơđong đôč ôh, ăt kiăng kơplong đĭ hloh. Tui hăng Thạc sỹ Hà Trung Thành - Nai pơtô phun Tơlơi hrăm akŏ pơdong Ping gah, Sang hră pơtô ngă khua ƀôn prong Hồ Chí Minh lăi, Hră lăi pơthâo bruă kơđi čar mơ̆ng Khul khua apăn bruă git gai Ping gah, ƀu kơnong pơsit jơlan ngă bruă truh pơ thun 2030 đôč ôh, ăt jing bruă iâu pơthưr, jing tơlơi git gai ngă bruă.

“Tơlơi pơhiăp pơdah pran jua plih phrâo, jing tơlơi lăi dlăm kiăng pơplih kơtang, sit hloh, lăi biă, ngă biă, boh than ba glăi biă mơn, ƀu kơnong amăng bruă bơwih ƀong đôč ôh, wơ̆t amăng bruă kơđi čar, mơnuih mơnam, gru grua hnun mơn. Pơƀuh pran jua kơtưn đĭ mơ̆ng djuai ania ta. Lăng yom tơlơi pơmin gơgrong mă pô čih pơkra hơdră đĭ kyar, ngă mă pô, wai lăng mă pô, đăo kơnang kơ jơlan mơ̆ Ping gah hăng mơnuih ƀôn sang ta ruah mă”.