Hơdip amăng sang anŏ tơnap tap ƀơi să kual ataih, asuek Dă Knàng (tơring glông Đam Rông, tơring čar Lâm Đồng), Ka Huệ khŏm pơdơi sang hră lơ̆m glăk hrŏm anih 11, dŏ pơ sang djru amĭ ama ngă đang hmua. Lơ̆m glăk 17 thun, Ka Huệ lĕ mơnuih abih pran jua amăng bruă ngă hmua kah hăng djru bruă amăng plơi pla.

Ka Huệ hrŏm hăng ƀing čơđai plơi Pul

Ƀơi să Dă Knàng hyuh hyiăng lŏn mơnai lăp djơ̆ hăng bruă pla pơtơi Laba. Tlâo thun hlâo anun, anom bơwih ƀong hrŏm pla pơtơi Laba Dă Knàng hơmâo akŏ pơjing amăng plơi pla, Ka Huệ pla pơtơi amăng đang prong 5.000 m2 pơlir hăng anom bơwih ƀong hrŏm. Ăt amăng hrơi blan anai, Ka Huệ nao ngă kông nhơn ƀơi anom bơwih ƀong hrŏm, hăng prăk apah 7 klăk prăk. Ñu ăt hơmâo pơsur dong 4 čô hlăk ai djuai ania ƀiă amăng să nao mă bruă hrŏm, hăng hơmâo prăk pơhrui hơđong. Rơngiao kơ mông mă bruă ƀơi anom bơwih ƀong hrŏm, Khua khul hlăk ai plơi Pul, Ka Huệ hyu jak iâu hlăk ai amăng plơi djru pơtô pơblang hơdôm tơlơi črâo trun mơng Ping gah, tơlơi phiăn mơng Kơnuk kơna, laih dong pok pơhai hơdôm hơbô̆ bruă pơđĭ kyar bơwih ƀong huă ba glăi tŭ yua.

“Amăng bruă pơtô pơblang ƀing gơmơi lêng kơ ngă tui hơdôm tơlơi pơtă pơtăn mơng ƀing anong met wa brơi kơ hlăk ai čơđai. Mơng anun ƀing gơmơi dưi pơtrut pơsur ƀing hlăk ai amăng plơi pla ngă tui ƀơƀrư̆. Ngă hiưm pă kiăng jak iâu hlăk ai amăng plơi thâo gum pơgôp, gir bơwih ƀong huă, anăm ngă soh hăng tơlơi phiăn. Truh rơnuč blan, khul hlăk ai pơphun jơnum pơƀut sa wŏt kiăng pơgôp hiăp, lăi pơthâo hơdôm hơbô̆ bruă ba glăi tŭ yua sit nik brơi kơ hlăk ai. Kâo pô kiăng pơphun ba glăi tŭ yua blung hlâo, laih dong sem lăng dưi ba glăi prăk pơhrui lu hloh, laih anun kâo črâo brơi ƀing hlăk ai pơkŏn ngă. Ƀing gơmơi glăk pok pơhai hơbô̆ bruă pla phun kơbuă, hăng ră anai rĭm plah hmua pla phun kơbuă rông hlăt pơhrui mơng 7 truh pơ 10 klăk prăk rĭm hrơi.

Ñu lĕ Khua khul hlăk ai hur har pran jua amăng bruă mă, Ka Huệ ăt lĕ nai ia jrao amăng plơi pla, laih dong lĕ sa čô mơnuih djru bruă amăng plơi pla. Plơi Pul, să Dă Knàng hơmâo 120 boh sang anŏ, hăng giăm 80% lĕ djuai ania K’ho. Yua anai lĕ kual ataih, asuek yua anun dŏ lu tơlơi phiăn sô hơđăp ƀu hiam dŏ djă pioh. Ka Huệ hơmâo gir run pơtô pơblang kiăng neh met wa lui hĭ hơdôm tơlơi phiăn sô hơđăp ƀu hiam anun lĕ: pơdô̆ rơkơi bơnai mơng muai, pơdô rơkơi bơnai ha kơtăk drah, črâo brơi neh met wa rang kơđiăng amăng pơgang klin, ƀong huă brơi hơdjă, rơmet pơagaih anih dŏ hơdip jum dar.

“Kâo lĕ khua khul hlăk ai plơi Pul, djru rah bruă amăng plơi pla. Hlâo anun aka hơmâo mơnuih djru bruă jŭ yap mơnuih amăng plơi pla, aka ƀu hơmâo mơnuih črâo ba, hyu pơtô pơblang bruă pơdô̆ rơkơi bơnai, ha kơtăk drah ƀuh lu biă mă anai lĕ bơyai nao rai ană neh met wa hăng tơlơi pơmĭn hŭi đut djuai. Samơ̆, mơng hrơi hyu pơtô pơblang, črâo brơi neh met wa lui hĭ, bruă anai ƀuh aset tui yơh. Hlăk ai dưi pơdô̆ rơkơi bơnai gah djuai ania pơkŏn anun lĕ yuăn, Cil hăng djuai ania pơkŏn…Huăi ƀuh tơkeng 3,4 čô ană tui hlâo adih, mơ̆ ră anai neh met wa thâo hluh tơkêng 2 čô đôč kiăng kơ amuñ čem rông truh prong giong mơnuih. Lơ̆m klin hơđuh đĭ, hyu jak iâu neh met wa nao tlâ̆o ia jrao pơgang”.

Ka Huệ mut hrŏm “Hrơi tơjuh mơtah”

Hăng pran gir run, gơgrong amăng bruă mă, amăng akŏ thun anai, Ka Huệ hơmâo arăng pơmut amăng Ping gah Cộng sản Việt Nam. Yă Mbon K’Thơm, kơ-iăng Jơnum min mơnuih ƀon sang să Dă Knàng, tơring glông Đam Rông, tơring čar Lâm Đồng brơi thâo: Amăng hơdôm thun laih rơgao, Ka Huệ hơmâo gơgrong gum hrŏm hăng djop anom bruă amăng plơi pla, să pơtrut bruă pơtô pơblang, lăi pơthâo hơdôm tơlơi pơplih phrâo kơ neh met wa amăng plơi pla kiăng pơplih tơlơi pơmĭn, bruă mă. Sit biă ñu lĕ pơtô pơblang kiăng lui hĭ pơdô̆ rơkơi bơnai ha kơtăk drah. Pok pơhai bruă man pơdong plơi pla phrâo ƀơi ƀon lan, amai Ka Huệ kah hăng plơi Pul hơmâo gir run gum pơgôp ba să Dă K’nàng dưi ngă pơgiong tui hơnong pơkă plơi pla phrâo.

“Ka Huệ lĕ Ping gah dŏ hlăk ai, hur har pran jua, thâo hrăm tui arăng, ñu lĕ khua khul hlăk ai, Ka Huệ lêng kơ gir run amăng pơđĭ kyar bơwih ƀong huă amăng sang anŏ hlăk ai amăng plơi pla, să, pok pơhai ngă tui hơdôm tơlơi jak iâu amăng plơi pla, Ka Huệ lêng kơ ngă klă soh. Ƀon lan ăt lăng ñu lĕ hlăk ai thâo rơgơi kiăng tŏ tui črâo brơi kiăng pơđĭ kyar, klă dong amăng bruă mă mơng đah kơmơi dŏ hlăk ai lăi phara hăng abih bang hlăk ai mơnuih djuai ania ƀiă hnun mơn”.

“Pơpă kiăng lêng kơ ƀuh hlăk ai, bruă tơnap hơget ăt hơmâo hlăk ai”. Anai lĕ tơlơi pơtô mơng Wa Hồ hơmâo hlăk ai să kual ataih, asuek Dă Knàng, tơring glông Đam Rông, tơring čar Lâm Đồng hơdor ngă tui. Amăng anun, Ka Huệ - Khua khul hlăk ai plơi Pul, să Dă Knàng lĕ sa čô mơnuih ba gru. Bruă mă mơng ñu hơmâo pơgôp prong prin kiăng pơplih tơlơi pơmĭn, bruă mă brơi hlăk ai ƀơi kual ataih.