Ƀơi ƀut plơi 5B, să Hoà Ninh, tơring čar Lâm Đồng, anih ơi yă, amĭ ama kơ amai Ka Thuân dŏ hơdip mơng đưm đă ră hlâo laih, ăt lĕ anih dŏ djă pioh bruă mơñam abăn ao. Mơng anet, amai Ka Thuân juăt hăng rup rap gui rêu rô, buh eng ao djuai ania pô mơng đah kơmơi K’ho, hơdôm blah kơtuai, akhăn tuang juăt yua samơ̆ pơdah anŏ yôm phara mơn.

Thun 2019, lơm pơdơi bruă jang jai ƀơi kông ti kiăng rông ană anet, Ka Thuân pơphun sĭ gơnam online hăng ƀuh lu mơnuih tơlơi đing nao kơ eng ao djuai ania pô. Amăng sang hơmâo lĕ măi čoh sum ao, laih dong hơmâo ama hăng amai ñu pơtô brơi bruă čoh eng ao mơng anet, ñu pok pơhai čoh eng ao, mă anăn păn sĭ mơdrô Ka Thuân Minz. Blung hlâo, ñu čoh hơdôm eng ao brơi kơ ñu pô pioh buh nao pơdô̆. Lăng hiam, hơmâo lu mơnuih pơpŭ, laih anun rơkâo ñu čoh brơi. Amai Ka Thuân brơi thâo:

“Hlâo kơ hrơi kâo pok sang čoh eng ao gru grua djuai ania K’ho, amăng plơi pla kâo ƀuh ăt hơmâo lu adơi amai hor buh eng ao djuai ania pô hăng hơdôm blah eng ao čoh pơplih tui rơnuk phrâo anai. Mơng anun kâo pơmĭn čoh pơlir hrŏm rup eng ao gru grua djuai ania hăng eng ao phrâo ră anai hăng tơlơi čang rơmang dưi djă pioh anŏ hiam mơng gru grua ơi yă pioh glăi, lơm ƀing hlăk ai buh eng ao anai ƀing gơñu amra hluh rơđah dong kơ gru grua pioh glăi mơng ơi yă mơng hơdôm blah eng ao, mơng anun thâo djă pioh ƀiă. Lơm arăng hor eng ao  hiưm pă kâo amra pơkra brơi tui tơlơi rơkâo mơng ƀing gơñu. Lơm arăng rơkâo čoh brơi hiưm pă kâo amra trơ̆i, pơkă bơnal tui anun. Ƀing mơnuih rơkâo čoh brơi ataih hloh lĕ ƀing dŏ hơdip pơ tač rơngiao. Sang čoh sum ao anai amra čoh brơi ƀing hlơi hor eng ao djuai ania pô”.

Gah tlôn tơlơi truh kih mơng Ka Thuân kiăng lăi nao tơlơi gum hrŏm kret kruai mơng sang anŏ. Ayong Ka Hùng, rơkơi ñu lĕ mơnuih ngă bruă pơkŏn amăng sang anŏ kiăng bơnai ñu hơđong pran jua hăng bruă čoh eng ao. Ƀu djơ̆ kơnong tui anun rĭm wŏt amai Ka Thuân ba eng ao nao pơdă prưng, lăi pơthâo, ba buh pơƀuh brơi amăng tơring čar hăng pơkŏn, ayong Ka Hùng nao gum hrŏm bơnai ñu hơdôm bruă kơtrâ̆o, wai lăng ană bă kiăng bơnai ñu hơđong pran ngă bruă:

“Kâo lêng kơ pơsur pran ñu kiăo tui tơlơi hor kơ bruă anai. Anai lĕ bruă gru grua mơng djuai ania pô, kiăng rơnuk tơdơi anai lêng kơ thâo. Kâo djru brơi bơnai hơđong ngă bruă, pơđĭ kyar tui bruă anai, lăi pơthâo abăn ao djuai ania K’ho tơl lu mơnuih, ƀu djơ̆ kơnong amăng lŏn ia ăt wŏt tač rơngiao dong”.

Hluai tui bruă mut hrŏm hơdôm hrơi buh eng ai hiam, lăi pơthâo eng ao djuai ania pô amăng hơdôm plang mơnuih mơnam, eng ao djuai ania mơng amai Ka Thuân jai hrơi hơmâo lu mơnuih thâo. Hơdôm blah eng ao yua amai Ka Thuân čoh ƀu djơ̆ kơnong ngă mơnuih buh hiam đôč ôh mơ̆ ăt ba glăi tơlơi pơ-ư ang. Thun 2024, tơlơi pơmĭn pơphun ngă bruă “ba eng ao djuai ania tơl abih bang mơnuih” mơng Ka Thuân dưi mă pri mrô dua amăng tal pơplông pơphun bơwih ƀong pơplih pơčeh phrâo tơring čar Lâm Đồng tal 7. Anai ƀu djơ̆ kơnong lĕ pri pơpŭ brơi tơlơi pơčeh đôč ôh mơ̆ ăt tŭ yap tơlơi gir run djă pioh hăng tŏ tui gru grua yôm phara mơng djuai ania pô amăng rơnuk hơdip phrâo anai.

Ayong K’Vũ dŏ amăng să Đinh Văn Lâm Hà brơi thâo, hăng tơngan rơmoăn rơmĕ mơng amai Ka Thuân, hơdôm boh eng ao dưi djă pioh pran jua, gru grua kual Dap kơdư rah, ăt hơmâo tơlơi pơplih lăp djơ̆ hăng rơnuk hơdip phrâo tŭ tă ră anai:

“Eng ao pơhưč lu mơnuih hor yua ră anai hơdôm blah eng ao čoh rai tui anai aset đôč. Hơdôm hrơi jơnum ngui yôm, ƀing ta ƀuh eng ao anai lăng hiam biă mă, amra ngă ƀing ta mưn phara, ngă pơ-ư ang hăng ngă pơƀuh tơlơi yôm. Ñu čoh eng ao hiam biă mă, kiăng kơ djă pioh kar hăng anai ăt glêh glar mơn, dưi djă pioh lĕ tơlơi yôm biă mă yơh”.

Hor biă mă hơdôm blah eng ai yua amai Ka Thuân čoh, amai Hoàng Thị Thanh Huyền, nai pơtô ƀơi Sang hră kơnuk kơna čem rông ba tơring čar Lâm Đồng brơi thâo:

“Kâo ƀuh hơdôm blah eng ao anai lêng pơdah pran jua hơdip, anŏ yôm phara mơng djuai ania ƀơi kual Dap kơdư, tui gru grua hơđăp samơ̆ ăt hơmâo tơlơi pơplih phrâo. Hơmâo lu eng ao pơplih hluai tui hơdôm bơnal mrai hơđăp, pơplih hăng pơčeh phrâo. Kâo pô lĕ nai pơtô ƀơi Sang hră kơnuk kơna čem rông ba tơring čar Lâm Đồng, kâo ăt pơ-ư ang mơn kơ plơi pla tal dua hăng ƀuh hơmâo anŏ hiam anai kiăng djă pioh hăng kiăng tŏ tui lu ƀiă dong”.

Kret kruai hăng bruă mă lĕ mơnuih čoh eng ao amăng plơi pla, rĭm thun, hăng thong kăp laih dong tơngan rơmoăn rơmĕ mơng amai Ka Thuân, hơdôm rơtuh blah eng ao djuai ania hơmâo čoh pơkra rai, hơmâo buh amăng hrơi ngui ngor, pơdô̆ rơkơi bơnai hăng hơdôm hrơi ngă yang pơprong. Sit biă ñu, rup rap ƀing đah kơmơi djuai ania K’ho buh eng ao djuai ania pô amăng hrơi dô̆ rơkơi lĕ tơlơi ngă hok mơ-ak biă mă amăng pran jua amai Ka Thuân.

Amăng tơlơi hơdip jai hrơi pơplih phrâo ƀơi kual Dap kơdư, amai Ka Thuân Minz ăt kret kruai ƀơi măi čoh eng ao, pơdah pran hor gru grua djuai ania K’ho amăng rĭm glông mrai čoh. Mơng hơdôm blah eng ao djuai ania pô, Ka Thuân Minz glăk čoh pran tơlơi hor-tơlơi čang rơmang gru grua dưi djă pioh, pơpŭ hăng ngă lar hyu amăng tơlơi hơdip ră anai./.