Tui lăi pơthâo mơng Jơnum min mơnuih ƀôn sang tơring čar Khánh Hòa, 9 blan thun anai, tơlơi bơwih ƀong huă amăng tơring čar tŏ tui pơđĭ kyar hơđong, GRDP giăm 7%. Hơdôm bruă ngă hmua, tuh tia pơkra ming, bơwang bơwang lêng tŏ tui hơkrŭ glăi. Pơhrui ngăn drăp kơnuk kơna rơgao hăng mrô pơkă. Hơdôm gơnong bruă pơkra pơjing, tuai čuă ngui hăng tơlơi bơwih bơwang glăk hơkrŭ glăi tong ten. Anom bơwih ƀong sĭ mơdrô amăng tơring čar ăt gơgrong ƀiă dong amăng bruă blơi yua gơnam amăng lŏn ia, plai ƀiă blơi mut mơng tač rơngiao. Khánh Hòa hơmâo ruh pơkra giong sang tơ̆i phŏ, sang dŏ jang jai, pok prong hơdră djru čan prăk man pơdong sang brơi kơ ƀong mơnuih pơhrui aset hăng ƀing kông ñơn. 3 jơlan hơdră tui hơnong pơkă dêh čar lêng kơ ba glăi boh tŭ yua prong, pơgôp pơplih anih anom, jơlan glông hăng tơlơi hơdip kual ataih, asuek.

Tui ơi Nguyễn Khắc Toàn, Khua Jơnum min mơnuih ƀôn sang tơring čar Khánh Hòa, hrŏm hăng hơdôm tơlơi klă anun, tơring čar ăt dŏ lu tơlơi gun mơn. Amăng anun, jao trun prăk tuh pơ alin man pơdong phrâo rơbêh 44%, yua gun amăng pơhrui glăi lŏn mơnai hăng pơmut hrŏm bruă dưm dăp tơdơi kơ pơmut hrŏm anih anom mă bruă. Anai ăt lĕ bruă tơring čar glăk đing nao pơsir hĭ:

“Ƀing gơmơi đing nao kiăng pơsir hĭ hơdôm akŏ bruă tơnap tap, gun găn, ƀing gơmơi jao bruă brơi ƀing apăn bruă amăng Jơnum min mơnuih ƀôn sang tơring čar glăm ba rĭm bruă phrâo. Pơphun jơnum tui tơđar, pơtrut pơsur, pơsir hĭ khut khăt pơ anăp anai. Čang rơmang hăng hơdôm tơlơi ngă tui anai, pran gir run pơsir hĭ tơnap tap, pơhlôm brơi rơnoh pơđĭ kyar”.

Khua ding jum ơi Nguyễn Hải Ninh lăng yôm tơlơi gir run mơng Khánh Hòa amăng bruă git gai-wai lăng, hơkrŭ glăi bơwih ƀong huă, pơtrut kơtang pơplih yua boh thâo phrâo amăng ngă hră pơ-ar hăng mă yua KPI amăng ĕp lăng, wai lăng ƀing apăn bruă.

Ơi Nguyễn Hải Ninh pơsit tong, tơdơi kơ pơmut hrŏm, Khánh Hòa hơmâo tơlơi gal pơđĭ kyar prong kơtang, hăng tơlơi dưi, tơlơi gal ƀiă đôč ƀon lan hơmâo, anun lĕ hang ia rơsĭ glông hloh đơ đam dêh čar, jơlan rơdêh đuăi hmar, tơdron rơdêh por, anom bruă apui lơtrik hăng tuai čuă ngui prong gưl dêh čar. Yua anun, Khánh Hòa kiăng pơsir hĭ tañ hơdôm anih gun kiăng ngă dưi hơnong pơkă pơđĭ kyar 8,1% amăng abih thun 2025, ngă tui tŭ yua hơdôm tơlơi pơtrun kơ tơhnal pơkă, hơdră bruă phara, sit biă ñu, kiăng pơtrut kơtang brơi abih rơwang ngă bruă. Khua ding jum Nguyễn Hải Ninh lăi:

“Hơmâo laih hơdôm anom bruă tuh pơ alin pơprong nao pơ Khánh Hoà ĕp lăng. Samơ̆ kiăng lăng glăi hơdôm akŏ bruă ƀơi kual plơi pla phrâo, kual ƀu mă jia hiưm pă ñu ? kiăng hơmâo hơdră hơget ? Kual bơwih ƀong phara hiưm pă ñu ? Pơtrut kơtang hiưm pă ñu ? Tơdah anun hơdôm anom bruă tuh pơ alin amra ngă tui ƀơƀrư̆ tui tơđar, amra ƀu dưi pơđĭ kyar ôh, jơlan gah mơng tơring čar pơlir hăng jơlan gah dêh čar”.

 Hăng tơlơi dưi, tơlơi gal glăk hơmâo hăng tơlơi gum hrŏm khut khăt mơng djop anih anom kơđi čar, Khánh Hòa glăk dong ƀơi anăp kơ lu tơlơi dưi kiăng hrưn đĭ kơtang, jing anom bơwih ƀong huă phun kual ia rơsĭ, tuai čuă ngui hăng bơwih bơwang kual Dơnung tong krah. Hơdôm tơlơi ƀuăn djru brơi, pơsir hĭ tơnap tap mơng djop ding jum, sang bruă gơnong glông čang rơmang amra pơtrut kơtang kiăng Khánh Hòa ngă tui hơnong pơkă pơđĭ kyar 8,1% amăng thun 2025./.