Ƀing tơhan djop sang bruă kơnuk kơna kơtưn hyu ĕp lăng, khut khăt brơi abih bang mơnuih mă bruă amăng ƀattô anun, khom tơbiă đuăi mơ̆ng ƀattô, glăi pơ sang anŏ hlâo kơ 6 mông tlam lơ 28/11; laih anun jŭ yap glăi abih 180 bit anih lŏn tơhlŏm, ia dăo kiăng pơgang hơđong tơlơi hơdip mơda kơ mơnuih ƀôn sang.

Tui hàng tơlơi pơtrun ječ ameč, čih hnăl pơčrâo tơlơi kom mơ̆ng Khua Jơnum min mơnuih ƀôn sang tơring čar Khánh Hòa, mă mơ̆ng 7 mông mơguah lơ 28/11, abih bang ƀattô pơgiăng hyu tuai, ƀattô pơgiăng gơnam, ƀattô hyu amă akan hơdang hăng djop mơta song nan, ƀattô anet prong amăng ia rơsĭ khom pơdơi abih bruă mă jăng jai; tơdơi kơ 18 mông tlam lơ 28/11, abih bang pô mơgăt ƀattô khom glăi pơ sang anŏ; ƀing ngă bruă rông akan hơdang amăng gruh, čơnăng hnun mơ̆n, ƀu dưi dŏ glăi amăng rơnưh anih rông akan hơdang ôh. Tơring čar Khánh Hòa, pơhlom klă krăp lăng na nao tơlơi pơhing hăng pơhiăp nao rai hăng djop pô mơgăt ƀattô amăng ia rơsĭ brơi thâo kơthel mrô 15 hlăk pưh rai hăng ĕp hơdră pơhlom hlâo tong ten. Nao ĕp ƀơi anih jưh djop mơta ƀattô akă lui či giăm hang hăng djop anih huĭ rơhyưt, ơi Trần Phong, Khua Jơnum min mơnuih ƀôn sang tơring čar Khánh Hòa rơkâo djop plơi pla, khul ling tơhan kơnuk kơna pơtô brơi mơnuih ƀôn sang dŏ kơđăp, khut khăt ƀu brơi dŏ glăi ƀơi anih hŭi rơhyưt, hlơi ƀu gưt, khom mă pơgô̆.