Tơlơi blah ngă ƀơi Trung Đông amra ngă nua ia jâo hăng prăk ngă bruă logistics đĭ, hăng prăk pơkra gơnam mơ̆ng anom bơwih ƀong đĭ tui mơn. Amuñ dŏ kơđông, tơ̆i dơnuai ƀu thâo nao rai pơgiăng gơnam pơ ia rơsĭ jar kmar ăt kah hăng bơbeč mơn kơ bruă ba sĭ gơnam pơ čar rơngiao, bơbeč nao hơdôm bruă bơwih ƀong akŏ phun mơ̆ng tơring Khánh Hòa kah hăng pơkra ƀattô, song, pơkra akan hơdang, pơdŭ pơgiăng pơ ia rơsĭ hăng čơkă tuai - bơwih bơwang. Ƀơi anăp tơlơi rung răng anih mơdrô ƀơi rŏng lŏn tơnah, lu anom mơdrô amăng tơring čar glăk prăp rơmet kiăng dưi kiăo tui tơlơi pơplih, ĕp lu anih sĭ mơdrô hăng pơđĭ tui anŏ yom mơ̆ng gơnam tam.

Yă Trịnh Thị Hồng Vân, Khua ping gah, Khua Khul ding kơna Kông ti gơgrong bruă tui prăk pơčruh ngăn sa ding kơna Yến Sào Khánh Hòa brơi thâo, anom  bơwih ƀong glăk gir plai ƀiă prăk apah kơ anih pơtruh brơi bruă mơdrô, pok prong anih blơi gơnam ba sĭ amăng dêh čar ta hăng hơdôm anih mơdrô pơprong: “Rơngiao kơ ba sĭ hruh čim ačăng črah, gơmơi amra pơđĭ tui pơkra gơnam hiam, klă hloh, mơ̆ng anun pơđĭ tui prăk pơhrui kơ tơring čar, kơ anom bơwih ƀong. Gơmơi amra ngă hrŏm hơdôm grup bơwih ƀong prong mơ̆ng dêh čar Khač či đĭ kyar”.

Tui hăng ơi Nguyễn Sanh Đương, Kơ-iăng khua Gơnong bruă pơkra gơnma sĭ mơdrô Khánh Hòa, tơlơi rung răng mơ̆ng Trung Đông glăk bơbeč sat kơ bruă pơkra gơnam, sĭ mơdrô mơ̆ng lu anom bơwih ƀong amăng tơring čar. Ră anai prăk ba sĭ gơnam mơ̆ng Khánh Hòa pơ kual anai hơmâo năng ai 210 klăk USD, jing giăm 10% mrô prăk ba sĭ gơnam pơ čar rơngiao, lơ̆m anun blơi gơnam năng ai 10 klăk USD. Nua ia jâo pơmă, anun yơh ngă kơ bruă pơkra ƀat tô, pơkra akan hơdang, čơkă tuai - bơwih bơwang tơnap biă mă, yua prăk pơkra hăng pơdŭ pơgiăng leng kơ pơmă soh. Ƀơi anăp tơlơi anai, anom bruă pơkra gơnam sĭ mơdrô glăk ngă hrŏm hăng Anom bruă wai lăng Kual bơwih ƀong hăng Kual sang măi pơkra gơnam tơring čar Khánh Hòa djru ba anom bơwih ƀong pơklaih hĭ anŏ tơnap, pơtrut ngă kơčăo bruă pơkra apui yua ia jâo hăng măi mok djru đĭ kyar. Ơi Nguyễn Sanh Đương brơi thâo: “Kiăng pơhrua tui, anom bruă pơƀut djru anom bruă tuh pơ alin. Biă ñu hăng dua kơčăo bruă pơkra apui lơtrik hrip pơ-iă yang hrơi Phước Thái 2, Phước Thái 3, gir mă yua amăng blan 3 anai, pơhrui anŏ yom apui lơtrik ba sĭ. Laih dong, ngă hrŏm hăng hơdôm gơnong bruă djru ba hơdôm anom tuh pơ alin boh thâo ia rơgơi, pơsir, pơklaih brơi anŏ tơnap, pơtrut man pơkra tañ hloh”.

Hơdôm tơlơi bơbeč mơ̆ng bruă bơwih bong ƀơi rŏng lŏn tơnah brơi ƀuh anŏ yom mơ̆ng bruă đĭ kyar bơwih ƀong gah ia rơsĭ hăng bruă logistics rơnuk anai. Hăng tơlơi găl hơmâo tơdrun ia rơsĭ dlăm, biă ñu ƀơi Vân Phong, Khánh Hoà glăk pơsit tơlơi gơgrong phun bruă pơdŭ pơgiăng ƀơi ia rơsĭ hăng logistics mơ̆ng kual Dơnung Tong Krah. Lơ̆m anih pơkra gơnam pơ rŏng lŏn tơnah akŏ pơjing glăi, bruă tuh pơ alin abih bang anih anom pơ tơdrun ia rơsĭ,  sang măi hăng logistics amra djru tơring čar dưi bong glăi tơlơi bơbeč mơ̆ng rơngiao. Ơi Nguyễn Thanh Hà, Kơiăng khua jơnum min mơnuih ƀôn sang tơring čar Khánh Hòa brơi thâo, kiăng hơmâo rơnoh đĭ kyar 2 mrô, tơring čar glăk lăng glăi abih rơnoh pơkă, pơklaih brơi tơlơi tơnap kơ anom bơwih ƀong hăng pơtrut ngă tañ hơdôm kơčăo bruă akŏ phun: “Tơlơi akŏ phun či đĭ kyar thun 2026 ăt jing bruă tuh pơ alin kơnuk kơna ngă pô mơn. Ƀing gơmơi khŏm krăp lăng, kah pơpha prăk, brơi nao prăk tuh pơ alin mơ̆ng akŏ thun mơtăm. Anai jing bruă yom biă mă, pơsit dưi ngă rơnoh đĭ kyar 2 mrô mơ̆ng Khánh Hoà amăng thun anai. Ră anai dŏ rơbêh 4.000 klai prăk kiăng kah pơpha rơđah rơđông”.

Amăng 2 blan akŏ thun 2026, tơring čar Khánh Hoà ăt bong kjăp mơn rơnoh đĭ kyar. Prăk pơhrui glăi hơmâo rơbêh 11.600 klai prăk, dưm dưm hăng 30% mrô Gơnong dlông jao hăng đĭ 1,7 wơ̆t pơhmu hăng tơđar. Amăng hrơi mông tơlơi bơwih ƀong ƀơi rŏng lŏn tơnah ƀu hơđong, bruă thâo git gai, ĕp anih sĭ mơdrô hăng pơtrut tui tơlơi gêh găl bơwih ƀong mơ̆ng ia rơsĭ jing hơdră djru Khánh Hòa dưi bong kjăp tơlơi đĭ kyar, ngă atur đah mơ̆ng dưi đĭ kyar hơđong amăng thun 2026 wơ̆t hăng hơdôm thun pơ anăp dong./.