Bruă kơƀah lŏn bơbôr hmư̆ hing hloh lĕ bruă pơkra jơlan ter hang ia rơsĭ Vạn Ninh – Ninh Hoà glông năng ai 25km, prăk tuh pơ alin rơbêh 2.000 klai prăk. Jơlan anai kiăng hơmâo 1,3 klăk met khô̆i lŏn bơbôr đĭ, samơ̆ yua ƀu hơmâo lŏn ôh anun yơh bruă man pơkra kaih hĭ, kơnong dưi ngă năng ai 30%. Ơi Trần Minh Chiến, Khua wai lăng Kual bơwih ƀing hăng hơdôm Kual sang măi pơkra gơnam tơring Khánh Hoà bơngơ̆t: “Jơlan ter hang ia rơsĭ ră anai bruă pơkra ñu tơnap biă, yua kơƀah lŏn bơbôr đĭ. Kơƀah lŏn bơbôr jing bruă brơi prăk či ngă bruă kaih hĭ mơn. Pơ anăp, hơdôm Kual sang măi pơkra gơnam pok pơhai man pơdong anih anom jing tơnap, dun hĭ mơn. Mơ̆ng hơne mơtăm, anom bruă tuh pơ alin bơngơ̆t biă yua ƀu hơmâo lŏn bơbôr, anih kiăng dor, lŏn či dor ƀu bơkơnar ôh kơƀah biă mă”.

Tui Gơnong bruă Hmua hăng Ayuh hyiăng tơring čar Khánh Hoà, hơdôm kơčăo bruă ƀơi tơring čar Khánh Hoà glăk kiăng năng ai 6,3 kăk met khô̆i lŏn dor, laih anun 350.000 met khô̆i boh pơtâo man pơdong. Kiăng pơsir hĭ bruă kơƀah pơtâo čuah, lŏn bơbôr, ƀing tuh pơ alin glăk pơdŭ pơtâo čuah, lŏn rơbêh mơ̆ng anih man pơkra jơlan pơkŏn. Ră anai lŏn, pơtâo rơbêh mơ̆ng tơdron tuh djah pơtâo čuah năng ai 3,3 klăk met khô̆i. Ơi Phạm Văn Hoà, Kơ-iăng khua Khul wai lăng hơdôm kơčăo bruă Hmua hăng Jơlan nao rai tơring čar Khánh Hoà brơi thâo, bruă pơdŭ pơgiăng jing bruă kiăng ngă biă: “Bruă anai amra hơmâo lu tơlơi gêh găl yua dưi prăp mă pô pơtâo čuah, lŏn či man pơkra jơlan, ăt ngă plai mơn lŏn, pơtâo glŏm lui soh. Yua dah, kah hăng ring bruă Khánh Hoà – Buôn Ma Thuột ăt tơnap mơn yua ƀu hơmâo anih či ba nao tuh. Jing ba nao pơ anih man pơdong pơkŏn lĕ plai ƀiă rơngiă prăk tuh pơ alin kơ 2 kơčăo bruă”.

Bruă kơƀah gơnam či man pơdong ƀơi Khánh Hoà yua arăng kiăng man pơdong lu, samơ̆ anih sĭ pơtâo, čuah, lŏn tơnah ƀơi tơring dŏ kơƀah, hră pơ-ar brơi klơi čuah, mă boh pơtâo hăng pơđĭ tui bruă pơkra hơdôm lu boh pơtâo, lŏn čuah ăt rơngiă lu hrơi mông biă. Kiăng dưi pơsir đut hlao, rơngiao kơ bruă pơdŭ pơgiăng gơnam man pơdong, tơring čar Khánh Hoà glăk lăng glăi hơdôm kual dưi klơi čuah, mă boh pơtâo, thâo rơđah hơdră wai lăng kông ngăn amăng gŭ lŏn amăng bruă čuk pơkra đĭ kyar tơring čar. Hrŏm hăng anun, sem lăng kĭ brơi hơdôm kual ƀu pơjuă nua dưi klơi čuah mă boh pơtâo, đah mơ̆ng ba nao lŏn čuah, boh pơtâo kơ hơdôm ring bruă, kơčăo bruă akŏ phun. Ơi Lê Huyền, Kơ-iăng khua Jơnum min mơnuih ƀôn sang tơring čar Khánh Hoà kiăng hơdôm anom bruă tuh pơ alin, anom bruă pơphô pơtô brơi khŏm prăp lui hlâo mơ̆ng hrơi prăp rơmet kơčăo bruă, sem lăng tong ten gơnam či man pơdong đah mơ̆ng hơmâo hơdră lăp djơ̆, hŭi hơmâo anŏ tơnap, pơgăn hĭ amăng bruă pơphun ngă: “Hơdôm anom bruă wai lăng kơčăo bruă khŏm pơsir hĭ bruă: Kơčăo bruă mơ̆ng pô ta kiăng gơnam man pơdong hơget? Pơpă? Nua ñu hơdôm? Hŭi kơ hơmâo bruă gơnam man pơdong hơget lĕ thâo, tơña pơpă, hơdôm prăk lĕ bu thâo ôh. Tơdah ƀu thâo lăi ôh mă mơ̆ng pơpă jing ƀu thâo ôh đăo lăng hlâo prăk kăk či ngă ring bruă, yua dah 3km hăng 5km ñu phara. Anun yơh ngă tơnap kơ anom bruă hmua hăng ayuh hyiăng amăng bruă ĕp anih, ba tơbiă hơdră či ngă bruă, ba pơmut amăng bruă čuk pơkra”./.