Jơnum anai, hơmâo pơtum 50 čô mơnuih rơgơi kơhnâo rai mơ̆ng dêh čar Mi, Hàn Quốc, Italia, Malaysia, Singapore. Ƀing mơnuih rơgơi kơhnâo lăi lĕ, kiăng mă yua anŏ gêh găl, Khánh Hòa kiăng kơsem min tong ten amăng ia rơsĭ hăng mă yua boh thâo ia rơgơi phrâo, ngă anŏ gơgrong phun atur kơ tơlơi pơčeh phrâo, pơtruh nao rai plah wah Kơnuk kơna, sang bruă mơdrô, ƀing mơnuih kơhnâo rơgơi hăng ană plơi pla.

Khua mua jơnum min mơnuih ƀôn sang tơring čar Khánh Hòa lăi pơtong, mông jơnum bơkơtuai anai jing anŏ gêh găl pioh kơ tơring čar anai hrŏm hăng ƀing mơnuih rơgơi kơhnâo, ƀing ngă bruă sĭ mơdrô hăng mơnuih ƀôn sang djru hrŏm lăi pơthâo hơdră mă bruă pơsir, lăi pơtong, tơlơi lir hơbit tong ten plah wah kơnuk kơna laih anun ƀing rơgơi kơhnâo pok pơhai ngă tui jơlan hơdră, tơlơi pơtrun mơ̆ng kơnuk kơna pơtrut tơlơi bơwih ƀong huă mơ̆ng ia rơsĭ. Lu tơlơi čih pơthâo, tơlơi pơgôp hiăp amra djru hrŏm ngă atur kơ tơlơi hrưn đĭ phrâo, djru Khánh Hòa jing kual pơđĭ kyar hơđong kơjăp, bơkơnar plah wah amăng tơlơi hơdip mơda bơwih ƀong huă amăng kual ia rơsĭ hăng anŏ ba yua boh thâo ia rơgơi phrâo rơnuk anai.