Hơdôm hrơi giăm rơnuč thun, lơm tuai čuă ngui jar kmar anun lĕ Nga, Hàn Quốc, Khač…pơwot glăi, bruă tuai čuă ngui tŏ tui pơsit tong tơlơi gơgrong sa amăng pă bơnah bơwih ƀong phun amăng tơring čar Khánh Hòa. Plih hĭ bruă pok prong tui mrô jŭ yap đôč, gơnong bruă tuai čuă ngui glăk hơdai nao hơbô̆ bruă ngă klă hloh, đing nao pơđĭ kyar mơtah hăng hơđong kjăp. Khua khul bơwih brơi tuai čuă ngui Khánh Hòa, ơi Phạm Minh Nhựt brơi thâo, tơlơi rơkâo pơplih ră anai lĕ ƀu dưi ngă kaih ôh:

“Tuai čuă ngui mơtah, tuai čuă ngui hơđong kjăp ƀu djơ̆ lĕ sa tơlơi yak nao phrâo đôč ôh mơ̆ ăt lĕ jơlan gah kiăng ngă tui ră anai mơng ƀing mơnuih bơwih brơi tuai čuă ngui. Lơm glăk dŏ tơguăn tơlơi djru ba mơng hơdôm anom bruă wai lăng kơnuk kơna, ƀing ta kiăng ngă tui mơng anai mơtăm kiăng pơđĭ kyar tuai čuă ngui hơđong kjăp. Bruă tuai čuă ngui ră anai jai đing nao anŏ pơđĭ kyar mơtah, wai pơgang jum dar, lơm ƀing ta pơplih phrâo amra pơhưč lu tuai čuă ngui”.

Ƀơi kual bơwih ƀong huă Vân Phong-kual pơtrut pơsur dêh čar tui akŏ bruă dưm dăp abih bang dêh čar-Khánh Hòa glăk pơhưč anom bruă tuh pơ alin đing nao hơbô̆ bruă tuh tia pơkra ming mơtah, lăp djơ̆ hăng jơlan gạ “akŏ pơjing hơbô̆ bruă pơđĭ kyar phrâo, pơplih glăi tơlơi bơwih ƀong huă” amăng črăn hră lăi pơthâo kơđi čar. Nai pran tha Phạm Hồng Điệp, Khua khul wai lăng kông ti pơčruh ngăn Shinec, anom bruă pơđĭ kyar tuh tia pơkra ming mơtah ƀơi Hải Phòng hăng ră anai kơsem min tuh pơ alin pơ Khánh Hoà, ñu brơi thâo:

“Amăng 3-4 kual tuh tia pơkra ming kiăng pioh phara brơi sa kual brơi kơ bruă pơkra ming asuk ruk, ia khŭ mơng anih pơkra pơjing. Yua kơƀah tơlơi anai, amra ƀuh hơdôm tơlơi bơdjơ̆ sat nao jum dar, mơng anun jing tơlơi ngă gun amăng pơđĭ kyar mơtah. Kơnuk kơna ră anai ăt glăk pơsur hơdôm hơbô̆ bruă pơkra glăi asuk ruk, bơwih ƀong rô nao rai”.

Khánh Hòa glăk phưč hơdôm akŏ bruă man pơdong anih anom phun amăng hơdôm bruă tơdrun kompăn - Logistics, kual tuh tia pơkra ming hơdjă, yua boh thâo măi mok phrâo hăng tuai čuă ngui klă hloh ƀơi kual bơwih ƀong huă Vân Phong, Cam Ranh hăng kual jum dar glông pơtrut Dơnung tong krah. Hrŏm hăng bruă pơhưč tuh pơ alin, tơring čar pơtrut pơplih ngă hră pơ-ar, ngă tui hơdră “sa bah amăng-sa anih ngă bruă phu”, yua boh thâo phrâo jơlan gah hăng lăi pơthâo kơ bruă pơsir hĭ. Yua jao brơi tong ten tơlơi glăm ba mơng rĭm gơnong bruă, sang bruă, hrơi mông pơsir hĭ lu hră pơ-ar tuh pơ alin-lŏn mơnai-man pơdong hrŏ trun mơng 30-40%; hơdôm hră pơ-ar pơlir lu anih anom ngă mơng hơdôm blan hrŏ trun dŏ hơdôm wŏt hrơi tơjuh. Ơi Trần Minh Chiến, Khua anom bruă wai lăng kual bơwih ƀong hăng kual tuh tia pơkra ming tơring čar Khánh Hòa brơi thâo, hơnong pơkă lĕ pơjing sa glông ngă bruă rơđah rơđông hăng tơpă sit, lăp djơ̆ jơlan gah pơplih phrâo hơbô̆ bruă pơđĭ kyar. Anom bruă wai lăng ngă kŏ djru brơi anom bruă tuh pơ alin pel ĕp, ngă hră pơ-ar, prap lui bruă dưm dăp truh pơ bruă pơhrui lŏn mơnai hăng pơlir hăng hơdôm gơnong bruă, sang bruă kiăng akŏ bruă dưi pok pơhai gêh gal ƀiă.

“Kiăng dưi jak iâu hơdôm anom bruă tuh pơ alin, ƀing gơmơi pơplih tơlơi pơmĭn amăng wai lăng hơdai nao gum hrŏm hăng anom bruă tuh pơ alin pơsir hĭ tơlơi gun. Ƀing gơmơi amra lĕ anom bruă črân ba kơ bruă tuh pơ alin, djru brơi anom bruă tuh pơ alin djop tơlơi pơhing, pơlir hăng hơdôm anom bruă wai lăng kơnuk kơna kiăng anom bruă tuh pơ alin gêh gal hloh lơm pok pơhai akŏ bruă”.

Lu akŏ bruă phun glăk hơmâo Khánh Hòa iâu pơthưr amăng rơwang thun 2025-2030, đing nao anih anom logistics, tơdrun kompăn tô nao rai amăng jar kmar, kual tuh tia pơkra ming mơtah, yua boh thâo phrâo, kual sĭ mơdrô rơngai. Anai lĕ hơdôm hơnong pơkă lăp djơ̆ hăng jơlan gah pơđĭ kyar “hơdôm anih phun prăk kak jar kmar, kual sĭ mơdrô rơngai brơi rơnuk phrâo” hăng “kual bơwih ƀong kual ia rơsĭ djop gơnong bruă” hơmâo lăi nao amăng črăn hră lăi pơthâo kơđi čar. Hrŏm hăng bruă pok prong tơlơi gal, tơring čar ba tơbiă tơlơi rơkâo ruah mă hơdôm anom bruă tuh pơ alin mơng blung mơtă kiăng bĕ hĭ akŏ bruă glăk dŏ đôm, kaih ngă ƀudah ngă ƀu klă. Khua git gai Ping gah tơring čar Khánh Hòa, Nghiêm Xuân Thành lăi pơtong:

“Hơdôm anom bơwih ƀong sĭ mơdrô thâo ngă bruă kiăng ƀuăn. Tơdah ƀu thâo ngă mơ̆ brơi ngă, ƀu pel ĕp glăi, tơdơi giong kah pel ĕp, amra pioh glăi lu tơlơi sat. Yua anun, kiăng ngă klă mơng pel ĕp blung hlâo truh pơgiong hăng amra ruah djơ̆ mơng blung. Bruă ruah mơng blung lĕ yôm hloh. Bruă anai ƀu kiăng ngă tui hơdôm tơhnal pơkă kơtrâ̆o ôh, mơ̆ gơnang nao hơnong pơkă mă yua AI, măi mok ĕp lăng tong ten, djru huăi ngă rơngiă mông brơi ngă tui akŏ bruă”.

Lăng nao abih bang, mơng tuai čuă ngui mơta truh pơ tuh tia pơkra ming rô nao rai, mơng pơplih ngă hră pơ-ar truh pơ bruă pơplih phrâo hơbô̆ bruă pơđĭ kyar, Khánh Hòa glăk ngă tui pran jua pơsit mơng črăn hră lăi pơthâo kơđi čar Jơnum tal XIV-pơđĭ kyar tañ, hơđong kjăp hăng gơnang nao hơdôm tơlơi pơtru phrâo. Lơm tơlơi pơmĭn djru brơi lăng prong hloh, lơm anom bruă tuh pơ alin hơmâo ruah mă rơđah rơđông hăng lơm pơđĭ kyar nao hrŏm hăng wai pơgang jum dar, Khánh Hòa hơmâo djop tơlơi gal kiăng yak nao rơwang pơđĭ kyar dua mrô, jing bơnah pơđĭ kyar phrâo mơng kual ter hang ia rơsĭ Dơnung tong krah hăng đơ đam dêh čar./.