Tui akŏ bruă, Khánh Hòa gir run pơjing bruă ngă hmua tŭ yua, pơhlôm mơnong ƀong huă, pơlir hăng hơnong pơkă ba tơring čar jing ƀôn prong gah gơnong glông amăng thun 2027. Akŏ phun lĕ ngă tui tơlơi gal bơwih ƀong huă kual ia rơsĭ, pơđĭ kyar kơtang bruă rông akan hơdang ia rơsĭ yua boh thâo phrâo, ba Khánh Hoà jing anih phun rông akan hơdang ia rơsĭ dêh čar; pơgiong bruă rông, pla, mă, pơkra pơjing hăng ba sĭ mơdrô akan hơdang tui jơlan pơplih phrâo, hơđong kjăp.

Tơring čar ba tơbiă hơnong pơkă pơđĭ kyar gơnong bruă ngă hmua, đang glai, akan hơdang rơbêh 3% rĭm thun. Truh thun 2030, pơhrui amăng kual anai giăm 8,5% mrô gơnam bơwih ƀong huă. Khul apăn bruă Ping gah hơmâo ba tơbiă 7 grup bruă jao, hơdră bruă akŏ phun, rơkâo djop gưl, gơnong bruă đing nao pok pơhai ha amăng plĕ, ngă pơplih tong ten amăng pơđĭ kyar ngă hmua, plơi pla phrâo pơ anăp anai.