Truh ră anai, đơ đam tơring čar Khánh Hòa hơmâo ngă giong abih laih bruă prăp lui či ruah khua pơ ala mơnuih ƀôn sang dêh čar tal 16 hăng ruah ƀing pơ ala mơnuih ƀôn sang djop gưl. 65 boh să, phường, anih gong gai phara hơmâo prăp lui 1.123 boh anih plĕ hră dưm dưm hăng 1.123 grup pơphun plĕ hră ruah khua. Anai yơh ƀing ngă bruă pơpha djop bruă  jao čih anăn, ƀlir pơtep hră pơdah thâo anăn, prăp lui hră či plĕ, hip plĕ hră kiăng pơhlom brơi bruă plĕ hră ruah khua djơ̆ tơlơi phiăn pơtrun.

Tui hăng Hră pơtrun mơ̆ng Khul khua mua pơphun bruă ruah khua, tơring čar Khánh Hòa dưi ruah 12 čô mơnuih ngă pô pơ ala mơnuih ƀôn sang gưl dêh čar tal XVI, hăng 20 čô mơnuih tơbiă anăn pioh ruah ƀơi 4 bit anih plĕ hră ruah khua. Hăng khul pơ ala mơnuih ƀôn sang tơring čar guang bruă thun 2026-2031, hơmâo 108 čô mơnuih tơbiă anăn, pioh ruah mă 67 čô ngă pô pơ ala sit nik. Ƀơi gưl să, đơ đam tơring čar či ruah mă 1.392 čô pô pơ ala. Truh mông anai, djop plơi pla ngă giong jơnum pơčrong sai tal klâo, ngă djơ̆ rơnoh pơkă, khul mơnuih hăng tơhnal pơkă djơ̆ tơlơi phiăn.

Hrŏm hăng anun, abih bang tal jơnum bơkơtuai nao rai pơčrong sai ruah mơnuih, čih anăn  pơtĕp ƀlir amăng pơnăng kiăng abih bang thâo krăn hăng ruah mă tơpă hăng pơhaih rơđah rơđong. Ƀơi să Xuân Hải, anăn mơnuih ƀôn sang ruah khua hơmâo čih pơtĕp ƀơi 17 boh kual plĕ hră. Gong gai kơnuk kơna plơi pla brơi jŭ yap glăi, lăi pơthâo tơlơi pơhing, laih dơ̆ng prăp lui bruă mă kiăng thâo tañ, hmao pơsir hĭ hơdôm tơlơi hơmâo, pơgang boh tŭ yua kơ mơnuih ƀôn sang ruah khua.

Ơi Nguyễn Trúc Hoà, Khua Jơnum min mơnuih ƀôn sang să Xuân Hải, tơring čar Khánh Hòa brơi thâo, gong gai lăng glăi abih bang, lăng tơlơi pơhing phrâo, laih dong thâo hlâo, pơsir hĭ djŏp bruă aka ƀu gêh găl, pơhlom tơlơi dưi kơ mơnuih nao plĕ hră.

“Să glăk prăp rơmet tĕp hră čih anăn abih bang ƀing khua tơbiă anăn či ba ruah ƀơi hơdôm anih plĕ hră. Pơ anăp, Jơnum min mơnuih ƀôn sang să git gai lăng glăi, thâo djŏp tơlơi bơdjơ̆ nao mơnuih nao plĕ hră hăng mơnuih ƀôn sang; pơsir brơi tañ hơdôm bruă ngă kơđi tơdah hơmâo; laih dong kiăng pơhlom hơđong plơi pla hlâo, amăng hăng tơdơi kơ hrơi plĕ hră”.

Ƀu kơnong ƀơi kual plơi prong đôč ôh, lu tơring čar ter hang ia rơsĭ, anih hơmâo lu mơnuih ƀôn sang mă akan hơdang trun nao pơ ia rơsĭ sui hrơi, bruă jŭ yap glăi ană mơnuih ƀôn sang ruah khua ngă ten hloh. Djop grup plơi pla, ƀôn ƀut, tơhan kông an ngă hrŏm nao tơl rim sang anŏ jŭ yap, ĕp glăi tơlơi pơhinfg, kiăng thâo mrô mơnuih hyu mă bruă amăng ia rơsĭ, hrơi blan dŏ mă bruă amăng ia rơsĭ, glăi pơ sang anŏ hiư̆m pă, mơ̆ng anun hơmâo hơdră lăi pơthâo, jak iâu nao plĕ hră ruah khua djơ̆ hrơi mông hăng djop tum. Ƀơi plơi ƀut Thành Đạt, phường Nam Nha Trang, anih hơmâo rơbêh 1.600 čô mơnuih ruah, amăng anun 200 čô ngă bruă hyu mă akan hơdang amăng ia rơsĭ, bruă jŭ yap khom ngă tui re se, krăo lăng tong ten sit nik amăng mơnuih ƀôn sang. Yă Nguyễn Thị Hoa, Khua grup ƀut plơi ƀơi anun lăi:

“Ta khom kiăo tui ƀuh sit nik bruă ngă mơ̆ng mơnuih ƀôn sang đôč. Gơmơi nao jŭ yap glăi tơl sang anŏ. Ngă hrŏm tơhan kông an amăng kual čih pioh mrô mơnuih. Mơnuih ƀôn sang nao pơ ia rơsĭ mơ̆ng 1 wơ̆t hrơi tơjuh, ƀơi anŏ truh 1 blan kah mơ̆ng glăi, sang anŏ lăi pơthâo anăn mơnuih dưi ruah khua. Gơmơi sem lăng djơ̆ hnơ̆ng sit nik tui anun jak iâu nao plĕ hră ruah khua”.

Hrŏm hrŏm hăng anun bruă jŭ yap glăi anăn mơnuih ruah khua, bruă mă hyu pơtô lăi djop anih, djru pơtrut tơlơi thâo hluh hăng bruă glăm ba mơ̆ng mơnuih ƀôn sang. Glông bruă pôr tơlơi pơhing hăng mikrô truh pơ plơi pla, pơphun lu khul grup, ling tơhan ngă bruă na nao, djru mơnuih ƀôn sang ruah khua thâo tong ten tơlơi pơhing anih plĕ hră, hrơi mông plĕ hră, ăt kah hăng bruă ngă mơ̆ng ƀing tơbiă anăn. Mơ̆ng lơ 26/2 truh lơ 14/3, djop sang bruă, anom bruă, ling tơhan, mơnuih hyu mă bruă ngă hrŏm khul pơphun bưp mơnuih ƀôn sang, ngă gêh găl kơ mơnuih ƀôn sang ruah khua thâo hluh tong ten kơ ƀing tơbiă anăn pioh ruah ngă pô pơ ala, mơ̆ng anun ĕp lăng tong ten hloh ruah mơnuih hơmâo kơnuih hiam hơdip tơpă, mă bruă hur har hăng thâo bruă hloh. Ơi Võ Chí Vương, Khua Gơnong bruă čar tơring čar Khánh Hòa brơi thâo:

“Hyu pơtô pơblang na nao mơ̆ng ră anai truh hrơi nao plĕ hră ruah khua, mikrô pôr pơthâo mơ̆ng să ăt pok na nao rim hrơi, pôr pơthâo boh ym phun kơ bruă ruah khua, kiăng mơnuih ƀôn sang hơdor lơ 15/3 nao plĕ hră ruah khua. Giong pôr pơthâo anăn ruah khua, khom pơđok na nao anăn ƀing tơbiă anăn pioh ruah ngă khua”.

Laih ĕp lăng bruă prăp lui hlâo ƀơi plơi pla, khua mua tơring čar Khánh Hòa pơtrun hiăp djop sang bruă pôr tơlơi pơhing khom lăng tơlơi pơhing sit nik, prăp lui djop kiăng thâo anŏ kiăng mơ̆ng mơnuih ƀôn sang hăng tơlơi bơtŭ ư hrŏm abih bang amăng mơnuih ƀôn sang, pioh pơgôp hrŏm ngă giong tŭ yua kơ bruă ruah khua. Ơi Trần Phong, Khua Jơnum min mơnuih ƀôn sang tơring čar Khánh Hòa lăi pơtong:

“Hăng bruă mă ruah khua lĕ tơlơi hyu pơtô pơblang pôr pơthâo gơgrong yom biă mă, hyu pơtô lăi mơnuih ƀôn sang kiăng thâo hluh boh yom kơ bruă plĕ hră ruah khua, sa bơnah dơ̆ng kiăng mơnuih ƀôn sang thâo hluh kơ tơlơi gơgrong glăm ba, tơlơi dưi mơ̆ng mơnuih ruah khua. Mơ̆ng anun, kiăng mơnuih ƀôn sang thâo hluh, rong pran jua dong yua nao plĕ hră ruah khua”.

Hăng bruă prăp lui sa hnơ̆ng, tong ten, Khánh Hòa hlăk ngă giong črăn bruă djơ̆ tơlơi pơkă, pơhlom brơi abih bang mơnuih ƀôn sang dưi plĕ hră nao plĕ hră djop, ruah khua, djru hrŏm ngă pơgiong tŭ yua sit nik Hrơi jơnum prong mơak kơ abih bang mơnuih ƀôn sang amăng dêh čar laih anun akŏ pơdong bruă kơnuk kơna hơđong kơjăp tong ten hloh.