Amăng rơwang bruă thun 2020-2025, bruă tuh tia pơkra ming hăng apui yua ia jâo ngă pơblih ƀuh rơđah ƀơi Khánh Hòa, djru pơđĭ tui rơnoh pơhrui glăi pơkă dưm dưm rim čô mơnuih mă bruă amăng sa thun 113 klăk prăk. Bruă tuh tia pơkra ming ƀơi Vân Phong, bruă ia jâo, apui yua ƀơi Dơnung Khánh Hòa amra hmao kiăo tui bruă čơkă tuai ƀơi Nha Trang hăng Cam Lâm. Hơdôm tơlơi pơhing anai brơi ƀuh, bruă tuh tia pơkra ming hăng măi mok laih anun ia jâo, apui yua amra jing  kah hăng tơmeh phun, ba tơring čar Khánh Hòa yak nao “Hơpluh thun pơđĭ kyar truh dua mrô”.

Hră pơtrun kơđi čar pơdah thâo amăng mông jơnum ruah khua ping gah tơring čar Khánh Hòa tal I, rơwang bruă thun 2025-2030 lăi pơtong, kiăng dưi ngă djơ̆ hăng anŏ gơgrong tơmeh phun bruă tuh tia pơkra ming hăng apui yua ia jâo, kiăng  hơmâo anŏ pơtrut dăp glăi, pơblih phrâo hăng pơđĭ tui boh tŭ yua mơ̆ng sang bruă mơdrô kơnuk kơna ngă pô tui jơlan gah bruă sĭ mơdrô prong, ngă djơ̆ tơhnal pơkă mơ̆ng jar kmar tơlơi thâo git gai. Tơlơi anai  mut hrŏm hăng anŏ lăng nao pơ anăp adih pơđĭ kyar mơ̆ng sang bruă sĭ mơdrô amăng tơring čar. Yă Trịnh Thị Hồng Vân, Khua kông ty Yến sào Khánh Hòa, kah pơpha:

“Kông ty amra ba  anom bruă yến sào hruh ia bah čim ačăng črah ia rơsĭ jing gơnam sĭ mơdrô phun. Kông ty amra dăp glăi hơbôt, pơmut hrŏm, pơčlah  hơdôm  sang bruă  kiăng pơmut hrŏm mă bruă tŭ yua hloh. Ƀing gơmơi amra pơtrut pơblih yua ia rơgơi mrô. Boh nik ñu, khul mă bruă pơkra ming ăt tuh pơ alin blơi măi phrâo kiăng dưi djop anŏ gêh găl či mă bruă”.

Hrŏm hăng pơđĭ tui tơlơi kơtang amăng bruă tuh tia pơkra ming tui gru grua juăt ngă Khánh Hòa pơkă tơhnal mă bruă pơhưč tuh pơ alin ba yua boh thâo ia rơgơi hăng điện tử, pơkra măi điện tử, hrĕ pơkĕ yua apui lơtrik añĕ, boh thâo ia rơgơi ană mơnuih pơjing rai, anih djă pioh mrô rơnoh ƀơi dêh čar. Kiăng dưi hrưn đĭ ngă tuiđjop boh tơhnal anai, tơring čar ngă hrŏm gơnong dlông čuk pơkra giong tañ jơlan glông brơi hiam klă, pơtruh nao rai pơ tơdron rơdêh por Vân Phong, Cam Ranh tơkuh hăng jơlan rơdêh đuăi hmar Kơdư-Dơnung dêh čar, kual Yŭ-Ngŏ hăng jơlan rơdêh treng đuăi hmar. Ơi Trần Minh Chiến, Khua wai lăng anom bơwih ƀong huă hăng anom tuh tia pơkra hăng măi mok tơring čar Khánh Hòa h’ĭn glăi pran jua, sit tơring čar prăp lui djop anih, lŏn rơgoh, apui ba, ia pơtruh hơđong, bruă bơwih bơwăng djop, ƀing ngă bruă mơdrô tuh pơ alin hơđong pran jua ba prăk tuh pơ alin kơ tơlơi bơwih ƀong huă.

“Tơlơi gêh găl lĕ pơkă anih man pơdong hơmâo pơsit laih. Abih amăng tơring čar Khánh Hòa kah hăng sa boh ƀattô, khul wai lăng anih bơwih ƀong huă laih anun anih tuh tia pơkra ming lĕ sa boh akŏ ƀattô, djru pơtrut đĭ kiăng tơlơi bơwih ƀong huă Khánh Hòa pơđĭ kyar truh 2 mrô. Tơhnal pơkă lĕ tui anun, samơ̆ khom ruah anăn sang bruă mơdrô hơmâo prăk tuh pơ alin, kơčăo bruă anun khom dưi ngă tui sit nik”.

Nao hrŏm bruă tuh tia pơkra ming, tơmeh phun jing apui yua, ia jâo. Tơdơi kơ pơmut hrŏm, anŏ gêh găl tơring čar Khánh Hòa ƀuh rơđah, anŏ gêh găl hơmâo laih hlâo lu biă mă. Tơring čar hơmâo pơkă tơhnal pơđĭ kyar  kơtang apui yua pơkra ming hăng jua angin ƀơi ia rơsĭ, apui yua hăng pil pơ-iă yang hrơi, apui pơkĕ hăng ayuh LNG hăng apui lơtrik put ayuh, pơkĕ hăng hrĕ apui lơtrik dêh čar ba yua boh thâo ia rơgơi phrâo. Biă mă ñu, dua kơčăo bruă  pơkra apui lơtrik ayuh gah Dơnung Khánh Hòa, dưi lăng hơmâo anŏ gơgrong yom ƀơi gưl dêh čar, pok brơi jơlan hơdră Khánh Hòa amra jing anih pơđĭ kyar phrâo, lir hơbit hăng bruă tuh tia pơkra ming anet nao hrŏm, bruă bơwih bơwăng kơ bruă pơkra ming ia rơgơi phrâo hăng pơtô hrăm mơnuih mă bruă kơhnăk, mơnuih kơhnâo rơgơi amăng mă bruă. Ơi Hồ Xuân Ninh, Khua Gơnong bruă Tuh tia pơkra ming hăng sĭ mơdrô tơring čar Khánh Hòa, brơi thâo, tơring čar hlăk pơtum pran jua kơ kơčăo bruă yom hloh anai yơh.

“Ră anai, bruă duh glăi pơklaih ala lŏn huăi jing sa tơlơi  tơnap ôh, bruă phun lĕ kiăng pok pơhai tañ. Đạ mơ̆ng hmao djơ̆ hrơi blan či pơkĕ yua apui lơtrik, djru kơ bruă pơkra ming hăng blơi yua gêh găl. Kiăng đing nao kơ bruă ĕp mơnuih mă bruă rơgơi, tŭ yua, djơ̆ hăng anŏ kiăng mơ̆ng djop sang bruă mơdrô či dŏ tơguan”.

Kiăng dưi ngă djơ̆ lăp hăng anŏ či kiăng anun, pơđĭ tui hơnơ̆ng đĭ kyar tuh tia pơkra ming hăng apui lơtrik či yua djop, tơring čar Khánh Hòa pơdah thâo lu hơdră: pơblih phrâo hơdră ngă hră pơar, pơhrŏ ƀiă hrơi mông ngă hră pơar jao bruă mă; iâu pơtum mơnuih mơnam, gơnam yua, prăk kăk mơ̆ng mơnuih mơnam, pơtrut pơsur djơ̆ lăp hơdai gum hrŏm kơnuk kơna hăng mơnuih ƀôn sang ngă pô čuk pơkra jơlan, man pơdong sang bruă, apui yua, boh thâo ia rơgơi phrâo hăng poblih yua mrô; đing nao pơtô hrăm mơnuih kơhnâo rơgơi mă bruă; ba yua tơlơi pơkă KPI, pơđĭ tui tơlơi gơgrong ba, lăi pơthâo bruă mă mơ̆ng sang bruă kơnuk kơna, ngă atur anŏ gêh găl pioh kơ sang bruă mơdrô dưi jing pô ba akŏ pơđĭ kyar. Khua git gai ping gah tơring čar Khánh Hòa-ơi Nghiêm Xuân Thành lăi pơtong:

“Kiăng tơring čar Khánh Hòa pơđĭ kyar 2 mrô, pơđĭ tui rơnoh prăk pơhrui glăi hơđong lĕ sit mơ̆n ƀu hơmâo jơlan pơpă dơ̆ng tah, khom ngă bruă tuh tia pơkra pơjing. Tơdah bruă tuh tia pơkra ming ƀu hơmâo hơdră pơtrut kơtang hloh, sit mơ̆n amra ƀu dưi ngă giong tơhnal bruă anai ôh”.

Mă bruă hăng Khul Khua apăn bruă phun ping gah tơring čar Khánh Hòa, Khua git gai pơ ala mơnuih ƀôn sang dêh čar ơi Trần Thanh Mẫn lăng yom anăp ngă bruă mơ̆ng tơring čar anai kiăng pơđĭ kyar kơñ pơgi:

“Anŏ gêh găl mơ̆ng tơring čar Khánh Hòa tơdơi kơ pơmut hrŏm. Anun lĕ, tơlơi gêh găl phara, rơnoh pơhno nao rai, anih pơphun bruă mă hăng pran kơtang pơđĭ kyar. Boh nik ñu tơlơi bơwih ƀong huă amăng ual ia rơsĭ, tuai čuă ngui, bơwih bơwăng, logistics, tơdrun kompan, bruă tuh tia pơkra ming, pơčeh phrâo pơkra măi mok, pơkra apui lơtrik hăng jua angin, apui lơtrik rơgoh, anih anom djă pioh mrô rơnoh. Khom lăng nao abih bang, ba yua anŏ gêh găl lu hloh, pơsir hĭ tañ tơlơi dŏ kơƀah tơdu”.

Tơring čar Khánh Hòa hlăk yak nao amăng jơlan hơdră phrâo, hăng bruă tuh tia pơkra ming laih anun apui lơtrik yua sa anŏ gơgrong phun. Anai ƀu kơnong tơhnal pơkă kơ bruă pơđĭ kyar bơwih ƀong huă đôč ôh, dŏ jing anih pơkă brơi arăng pơčrang lăng nao thâo krăn ten anŏ kơdưh hing ang tơring čar lơ̆m mut phung hăng jar kmar, anăp nao pơđĭ tui kơnuih hiam jing anom phun bruă tuh tia pơkra ming, ba yua apui lơtrik hơdjă laih anun man pơdong plơi prong phrâo rơgơi amăng thun 2030, laih dơ̆ng djru hrŏm ngă tui tŭ yua hơdră pơhlom pioh djop apui lơtrik yua kơ dêh čar.