Truh ră anai, đơ đam tơring čar hơmâo akŏ pơjing 66 Khul git gai bruă ruah khua, 66 čô ding kơna jơnum min pơphun ruah khua hrŏm hăng ƀing djru bruă; 4 khul pơphun bruă ruah khua pơ ala mơnuih ƀôn sang dêh čar, 19 khul pơphun bruă ruah khua pơ ala djop gưl ƀơi tơring čar hăng 387 khul pơphun bruă ruah khua ƀơi să. Hơmâo 65 boh să, phường, anih wai lăng phara hơmâo pơsit brơi laih 1.123 bit anih plĕ hră ruah khua hăng 1.123 grup ruah khua.

Hrŏm hăng anun, bruă jŭ yap, sem glăi abih bang anăn mơnuih ƀôn sang dưi ruah khua, bruă hyu pơtô lăi, pôr pơthâo hơmâo ba truh pơ kual plơi pla, pok mikrô pôr pơhmư̆ laih anun djop khul grup mơnuih tơpuôl hyu pơtô lăi, kiăng mơnuih ƀôn sang thâo tong ten hrơi blan, anih či nao plĕ hră hăng jơlan hơdră bưp mơnuih ƀôn sang mơ̆ng ƀing tơbiă anăn pioh ruah ngă pô pơ ala mơnuih ƀôn sang. Amăng guang hrơi tơjuh mă bruă blung a tơdơi kơ pơdơi ngă yang thun phrâo Bính Ngọ 2026, Gơnong bruă čar hơmâo jao hip plĕ hră kơ djop plơi pla. Mơ̆ng lơ 26/2 truh lơ 14/3, djop mông jơnum bưp mơnuih ƀôn sang dưi pơphun djơ̆ tơlơi phiăn pơtrun.