9 blan laih rơgao, rơnoh gơnam sĭ mơdrô pơkă dưm dưm abih bang ƀơi tơring čar Khánh Hòa đĭ tui 7%, dong tal 26/34 boh tơring čar, ƀôn promg amăng dêh čar hăng 4/6 amăng kual ter hang ia rơsĭ Dơnung Tong krah-Dap Kơdư; rơnoh prăk pơhrui mơ̆ng duh jia  lĕ hơmâo 28.800 klai, lu hloh 3% pơkă hăng rơnoh jao mơ̆ng gơnong dlông, đĭ tui giăm 50% pơkă hăng tal anai thun hlâo. Bruă tuai čuă ngui hăng bơwih bơwăng yơh anŏ bơngač hloh, hơmâo čơkă rơbêh 41,1 klăk wơ̆t tuai nao ngui, amăng anun 4,3 klăk wơ̆t tuai mơ̆ng jar kmar, prăk pơhrui glăi hơmâo 56.500 klai prăk, đĭ giăm 20% pơkă hăng thun 2024.

Ƀơi mông jơnum, Khua git gai ping gah tơring čar Khánh Hòa, ơi Nghiêm Xuân Thành lăi pơtong: Khánh Hòa khom pơtum glăi bruă mă phun, yom hloh, anăp nao kơ hơdôm kơčăo bruă pơprong, phun, atur kơ bruă man pơdong kiăng dưi ngă djop hăng đĭ hloh rơnoh jao 8% laih dơ̆ng pơsir hĭ 246 kơčăo bruă dŏ gun, pơhluh hĭ anŏ dŏ kơđong prăk tuh pơ alin hlăk ngă kaih hĭ. Ñu ăt pơtă pơtăn, khom ĕp lăng tañ akŏ bruă pơkă hnơ̆ng tơring čar Khánh Hòa phrâo kiăng ngă tui djơ̆ lăp, pơjing atur kơ djop akŏ bruă pơđĭ kyar pơ anăp adih.