Tơring čar Bình Dương lĕ dŏ amăng hơdôm tơring čar ƀơi dêh čar pơhưč lu prăk tuh pơ alin mơ̆ng dêh čar tač rơngiao hloh truh 4.200 kơčăo bruă, prăk rơkâo tuh pơ alin truh 40 klai USD; hơmâo năng ai 65 rơbâo boh anom bruă bơwih ƀong huă sĭ mơdrô amăng dêh čar hăng rơnoh prăk truh kơ 29,5 klai USD. Rơnoh prăk pơhrui glăi pơkă dưm dưm rim čô mơnuih lu hloh amăng dêh čar. Ră anai, Bình Dương hlăk anăp nao pơđĭ kyar bruă tuh tia pơkra ming ba yua măi mok phrâo, thâo rơgơi, jĕ giăm hăng anih dŏ jum dar kơnang kơ klâo tơmeh phun bruă mă:

Gong gai kơnuk kơna kjăp-mơnuih ƀôn sang sa pran jua, anom bruă sĭ mơdrô pô ngă bruă. Pơhiăp amăng mông jơnum, Khua anom bruă bơwih ƀong mơ̆ng ping gah dêh čar ơi Trần Tuấn Anh lăng yôm boh tơhnal tŭ yua mơ̆ng tơring čar Bình Dương dưi ngă, jing anih bơngač amăng dêh čar kơ hơdră pơđĭ kyar bơwih ƀong huă mơnuih mơnam xã hội chủ nghiã. Hơdôm boh tơhnal prong prin Bình Dương dưi ngă hơmâo djru hrŏm ƀu anet ôh ngă pơgiong tơlơi pơtô djơ̆ hăng bruă ngă tui sit nik pơtrut pơđĭ kyar bơwih ƀong huă tui jơlan hơdră ĕp anih sĭ mơdrô anăp nao jơlan hơdră xã hội chủ nghĩa ƀơi dêh čar amăng 40 thun rơgao.