Ƀơi mông mă bruă, khua mua anom bruă UIDAI lăi pơthâo abih bang bruă mă akŏ pơdong sang bruă hăng pơphun bruă mă, ba yua glông bruă wai lăng pơsit anăn akŏ mơnuih mơnam dêh čar India, sang bruă Aadhaar. Ră anai sang bruă anai čih anăn 12 boh mrô brơi kơ 1 klai 400 klăk čô mơnuih ƀôn sang amăng dêh čar, djru bruă wai lăng amăng điện tử, wai lăng ƀô̆ mơta pô anăn mơnuih ƀôn sang laih anun pơtruh nao rai hăng lu anom bruă ngă hră pơar amăng kơnuk kơna, anom bruă prăk kăk, anom bruă pơjrao duăm ruă, anom pơtô hrăm hăng djru ba mơnuih mơnam dêh čar.

Ơi Nguyễn Duy Ngọc lăng yom tơlơi thâo thăi, bruă ngă tom găn rơgao mơ̆ng dêh čar India akŏ pơjing bruă wai lăng mrô mơnuih ƀudah juăt lăi mrô akŏ mơnuih ƀôn sang amăng dêh čar, bơwih brơi bruă wai lăng tong ten, pơtrut bơwih ƀong huă tui ia rơgơi mrô. Dua bơnah ăt hơmâo pơčrong sai lu bruă mă pơdjơ̆ nao tơlơi thâo wai lăng mơnuih mơnam hăng mrô, čih pơdưm anăn mơnuih mơnam amăng plăng điện tử, hơdră thâo krăn ƀô̆ mơta pô anăn mơnuih ƀôn sang, pơgang tong ten anăn păn, kông ngăn, mrô gơnam mơ̆ng djop pô mơnuih ƀôn sang amăng dêh čar prong hăng lu, djru pơtrut bruă yua mrô ia rơgơi phrâo pioh pơhrăm nao rai tơdruă dua bơnah dêh čar tơlơi thâo thăi tom găn rơgao.