Amăng mông jơnum ơi Dương Văn Trang-Khua git gai Ping gah tơring čar Kon Tum hơmâo jao hră pơsit mơng Khul git gai ping gah dêh čar ruah ơi Nguyễn Đức Tuy ngă kơ-iăng Khua git gai Ping gah tơring čar Kon Tum rơwang thun 2020-2025. Ơi Nguyễn Đức Tuy, tơkeng lơ 5/6/1973, ƀơi să Hoài Đức, tơring glông Hoài Nhơn, tơring čar Bình Định; ñu hrăm Sang hră gưl prong gah tơlơi bơwih ƀong; hrăm truh nai prin tha gah bơwih ƀong huă; hrăm bruă kơđi čar gưl prong.

Đĭ phiăp amăng mông jao bruă, ơi Nguyễn Đức Tuy, kơ-iăng Khua git gai Ping gah tơring čar Kon Tum pơdah tơlơi pơpŭ bơni Khul git gai Ping gah dêh čar, Ping gah tơring čar Kon Tum, khua mua tơring čar amăng djop rơnuk hơmâo đing nao gum djru, đăo gơnang jao bruă yôm anai. Anai lĕ tơlơi pơ-ư ang mơng ñu pô, laih dong anai lĕ tơlơi glăm ba, bruă jao prong; amra abih pran jua pơgôp pơjing tơring čar Kon Tum jai hrơi pơđĭ kyar.