VOV4.Jarai - Ƀơi ƀirô mă bruă Sang gum hơbit djop dêh čar ƀơi New York, dêh čar Mi, Khua čih pioh gah Sang gum hơbit djop dêh čar ơi Antonio Guterres hmâo tŭ jum Khua anih jưh pơ ala kơ dêh čar ta Đặng Hoàng Giang, Khua Grŭp pơ ala kơ Việt Nam ƀơi Sang gum hơbit djop dêh čar.

Khua anih jưh pơ ala Đặng Hoàng Giang hăng Khua čih pioh gah Sang gum hơbit djop dêh čar ơi Antonio Guterres

Khua čih pioh gah Sang gum hơbit djop dêh čar ơi Antonio Guterres hur har hơ-ư̆č hmưi Việt Nam dưi ruah ngă ding kơna Khul wai lăng tơlơi dưi ană mơnuih mơng Sang gum hơbit djop dêh čar rơwang bruă 2023-2025, đăo gơnang Việt Nam amra gum hơgôp klă dong, ba glăi bôh tơhnal amăng bruă pơtrut hăng pơgang tơlơi dưi ană mơnuih. Khua čih pioh mơ-ak pơsit ñu amra rai čuă Việt Nam ƀrô djơ̆ tal hơdor glăi 45 thun Việt Nam mut hrom Sang gum hơbit djop dêh čar (1977-2022). Khua anih jưh pơ ala Đặng Hoàng Giang lăi rơđah bôh yôm mơng tal rai čuă mơng Khua čih pioh, pơsit Việt Nam pơkôl gir run gum hơgôp klă kơ bruă hrom mơng Sang gum hơbit djop dêh čar, amăng anun hmâo pơtrut hơdôm Tơhnal pơkă pơđĭ kyar kơjăp phik, bŏng glăi hăng pơplih ayuh hyiăng hăng djă pioh rơnuk rơnua, hơđong ƀơi jar kơmar./.

VOV.VN čih

Siu H’ Prăk pơblang