Hmư̆ tui tơlơi jak iâu mơng Khua mir sir dêh čar ta ơi Nguyễn Xuân Phúc, Khua čih pioh gah Sang gum hơbit djop dêh čar ơi Antonio Guterres rai čuă dêh čar Việt Nam mơng lơ 21-22/10/2022. Čơtlăm lơ 21/10, ngă lơphet čơkă dưi pơphun ƀơi Anih mă bruă Khua mir sir. Tơdơi kơ mông ngă lơphet čơkă mơtăm, Khua mir sir dêh čar ta ơi Nguyễn Xuân Phúc hmâo bơkơtuai laih hăng Khua čih pioh gah Sang gum hơbit djop dêh čar.

Amăng mông bơkơtuai, Khua mir sir dêh čar ta ơi Nguyễn Xuân Phúc lăi rơđah, hơdôm bôh than ƀuh rơđah, hmâo bôh tŭ yua gru grua mơng Việt Nam amăng pơđĭ kyar lŏn ia; pơsit jơlan gah pơtom hiăp rơngai, gơgrong pô, pơplih lu bơnah, lu mơta, gơgrong hlâo hăng mut hrom klă jar kơmar mơng Việt Nam. Khua čih pioh gah Sang gum hơbit djop dêh čar pơdah pran jua pha ra pioh kơ Khua mir sir Hồ Chí Minh hăng Việt Nam amăng bruă kơdŏng glăi ayăt hrưn đĭ tlaih rơngai djuai ania hăng pơdŏng glăi lŏn ia, hơ-ư̆č hmưi hơdôm bôh than yôm phăn mơng Việt Nam amăng pơgang pơgăn klin ruă Covid-19, hơkrŭ glăi hăng pơđĭ kyar bơwih ƀong - mơnuih mơnam; đăo gơnang Việt Nam amra pok pơhai dong bôh tŭ yua hơdôm hơdră bruă hơđong prong, mă mơnuih ƀôn sang ngă phun, pơgang anih anom dô̆, bŏng glăi hăng pơplih ayuh hyiăng, jing hơdră truh kih pioh hơdôm bôh dêh čar pơkon hrăm tui./.